Situata përpara Ministrisë së Arsimit ka përshkallëzuar sërish në përplasje të dhunshme fizike mes efektivëv...
AKTUALITET
Dhuna në protestë/ Jepet urdhri për lirimin e studentëve dhe ndalimin e gazit lotsjellës. Nën hetim edhe policët?
PiranjatPërditësimi i fundit 13 Tetor 2026, 19:54
Ministri i Brendshëm, Ervin Demo, mësohet se ka urdhëruar lirimin e studentëve të shoqëruar gjatë protestës së sotme në Tiranë, si dhe ndalimin e përdorimit të gazit lotsjellës ndaj protestuesve. Sipas burimeve, në fokus pritet të jetë edhe sjellja e efektivëve të Policisë së Shtetit, të cilët janë filmuar duke ushtruar dhunë ndaj qytetarëve gjatë ndërhyrjes për shpërndarjen e protestës.
Pamjet e publikuara nga terreni pritet të shërbejnë për verifikimin e veprimeve të policisë dhe për të përcaktuar nëse ka pasur shkelje të procedurave gjatë shoqërimit të protestuesve. Protesta e zhvilluar këtë të martë para Ministrisë së Arsimit nisi në mënyrë paqësore, por situata u përshkallëzua rreth orës 15:00, kur një grup protestuesish hodhën gurë dhe sende të forta drejt godinës, dëmtuan fasadën dhe thyen xhama. Më pas, përplasjet u zhvendosën, ku policia ndërhyri me autobotë uji dhe gaz lotsjellës.
Gjatë ndërhyrjes pati përplasje fizike mes efektivëve dhe protestuesve. Në disa prej pamjeve të transmetuara nga mediat, qytetarë shihen duke u tërhequr zvarrë dhe goditur gjatë shoqërimit, ndërsa pamje të tjera tregojnë studentë të gjakosur brenda automjeteve të policisë.
Policia e Shtetit njoftoi se ka shoqëruar 23 persona për veprime të mëtejshme procedurale. Sipas institucionit, gjatë protestës janë lënduar gjashtë efektivë policie dhe një gazetare, ndërsa strukturat hetimore të Drejtorisë Vendore të Policisë Tiranë, në bashkëpunim me Prokurorinë, kanë nisur veprimet për identifikimin dhe procedimin e personave të përfshirë në aktet e paligjshme.
