Kryeministri Edi Rama ka përsëritur thirrjen e tij për dialog me protestuesit, duke zgjedhur një formë simbolike për të p&e...
AKTUALITET
E dënuar në Greqi, zbardhet shkresa e Irena Gjokës për KLGJ: Nuk e dija!
PiranjatPërditësimi i fundit 23 Janar 2026, 20:21
“Nuk e dija.” Ky është thelbi i mbrojtjes së gjyqtares Irena Gjoka, e cila po përballet me procedura disiplinore, pasi rezulton e dënuar në Greqi,
Gjoka ka kundërshtuar procedurat e nisura ndaj saj në Këshillin e Lartë Gjyqësor, duke u justifikuar se një vendim dënimi i dhënë nga një gjykatë e huaj nuk mund të sjellë pasoja juridike në Shqipëri dhe nuk përbën shkak për shkarkim nga detyra. Pra një gjyqtare thotë se nuk e dinte se ishte e dënuar.
‘Në mungesë të dijenisë, nuk mund t’i përgjigjesha me ‘po’ pyetjeve në formular që kanë të bëjnë me hetimin, gjykimin apo dënimin nga Gjykata e Janinës,’ është shprehur ajo në qëndrimet e saj të zbardhur nga BW.
Gjyqtarja e posaçme Irena Gjoka rezulton e dënuar në Greqi për veprën penale të “falsifikimit të vizës”, sipas një konfirmimi zyrtar të Prokurorisë së Përgjithshme. Vendimi penal është dhënë nga Gjykata e Janinës në vitin 2005.
Sipas të dhënave zyrtare, Gjoka nuk e ka deklaruar këtë vendim dënimi në formularin e dekriminalizimit të dorëzuar në vitin 2016. Ligji nr.138/2015 për dekriminalizimin e konsideron fshehjen ose mosdeklarimin e të dhënave në formular si shkelje të rëndë disiplinore, e cila mund të pasohet me shkarkim nga detyra.
Dokumentacioni i administruar nga Sektori i Dekriminalizimit në Prokurorinë e Përgjithshme i është përcjellë Këshilli i Lartë Gjyqësor, i cili pritet të shqyrtojë nëse mosdeklarimi i vendimit penal përbën shkak për mbarimin e mandatit të gjyqtares.
Paralelisht, çështja po hetohet edhe nga SPAK, pas një kallëzimi penal për “falsifikim formularësh”, depozituar në maj 2024. Hetimi synon të përcaktojë nëse mosdeklarimi i dënimit penal përbën vepër penale dhe nëse ajo është kryer në mënyrë të vazhdueshme.
Në varësi të vlerësimit të institucioneve, ndaj Irena Gjokës mund të merren masa disiplinore deri në shkarkim nga detyra, si edhe masa penale, nëse konstatohet përgjegjësi për falsifikim dokumentesh.
Pjesë nga shkresa e Irena Gjokës, drejtuar KLGJ-së:
“Më datë 24 dhjetor 2002, unë Irena Gjoka jam paraqitur në pikën e kalimit kufitar Greqi, Kakavijë, ku policia kufitare më ka ndaluar hyrjen në shtetin grek (pas një debati që kam bërë me punonjësin e policisë së kufirit). Kam vlerësuar se autoritetet greke nuk kanë pasur asnjë arsye të ndalojnë hyrjen time në Greqi dhe për këtë arsye jam pajisur me një vize tjetër, pranë konsullatës greke në Shqipëri. Në vijim, më datë 13 shkurt 2003, jam paraqitur sërish në kufi, ku përsëri më është ndaluar hyrja, në mënyrë të padrejtë.
Meqenëse kam qenë e bindur në paligjshmërinë e masës administrative të ndërmarrë ndaj meje, refuzimin e hyrjes në shtetin grek, në kushtet kur nuk kisha të drejtë hyrje në këtë shtet, në datën 31.03.2003, kam autorizuar shtetasin Andon Konomi/Ikonomou (ky shtetas nuk ka pasur cilësinë e avokatit) për të kundërshtuar për llogari timen, masën administrative të marrë në mënyrë të paligjshme dhe arbitrare nga autoritetet greke, pranë Ministrisë së Rendit Publik Athinë apo çdo institucioni tjetër, për të kryer çdo lloj veprimi që nuk është i ndaluar me ligj, lidhur specifikisht me masën e ndalimit të hyrjes të dhënë ndaj meje.
Pavarësisht këtij fakti, personalisht nuk jam njoftuar, as zyrtarisht dhe as faktikisht për procesin gjyqësor administrativ apo ndonjë proces tjetër të zhvilluar ndaj meje, në gjykatat Greke. Pasi në media janë publikuar vendime administrative apo të natyrave të tjera në emrin tim, duke mos qenë në dijeni të asnjë vendimi, kam autorizuar përfaqësues me prokurë të posaçme për të marrë informacion, për çka publikohej.
Nga aktet që më janë dorëzuar nga përfaqësuesi im si dhe aktet e përcjella nga autoritetet greke me anë të letërporosisë, nëpërmjet Prokurorisë së Përgjithshme, jam informuar për herë të parë për vendimin e marrë nga Gjykata e Shkallës së Parë Janinë me nr.1447/2005, datë 07.06.2005, sipas së cilit rezultoj e dënuar në mungesë nga kjo gjykatë në datë 07.06.2005, pa praninë e një mbrojtësi, pa u njoftuar për procesin ndaj meje, si gjatë hetimit dhe gjykimit të çështjes, për veprën e parashikuar në paragrafin 7 të nenit 54 të ligjit 2910/2001 me titull “Hyrja dhe qëndrimi i të huajve në Territorin Grek”, me tre muaj burgim dhe 1500 Euro Gjobë. Dënimi me burgim është konvertuar me gjobë në masën 4,4 Euro në ditë.
Vendimi i datës 07.06.2005, i Gjykatës së shkallës së parë me tre anëtare për kundravajtje të Janinës nuk më është njoftuar asnjëherë dhe ky vendim nuk ka marrë formë të prerë. Sipas nenit 473 të Kodit të Procedurës Penale Greke afati për paraqitjen e apelit për të pandehurit me vendbanim të panjohur është 30 ditë nga dita e njoftimit të vendimit (vendimi i cili nuk është njoftuar asnjëherë). Përpara se të përfundonte afati i apelimit, më datë 17.06.2005 është miratuar ligji nr.3346/2005 “Përshpejtimi i procedurës para gjykatave civile dhe penale dhe dispozita të tjera”. Sipas edhe interpretimit të kryer nga GJEDNJ , në çështjen Panou kundër Greqisë (nr. 44058/05, 8 janar 2009), vendimi i dënimit i arkivuar sipas këtij ligji konsiderohet i paqenë, me kusht që, për një periudhë 18-mujore nga publikimi i ligjit (17 qershor 2005), të mos kryhet një vepër tjetër vepër penale me dashje, për të cilën do të dënohej përfundimisht me burgim më të gjatë se gjashtë muaj. Sipas edhe interpretimit të GJEDNJ-së edhe pse humbiste e drejta për të ushtruar apelim, efektet e ligjit ishin baras me shfajësim. Ky ishte edhe qëllimi i ligjit, i cili synonte përshpejtimin e drejtësisë penale, ndër të tjera, përmes uljes së numrit të apelimeve për çështje të vogla. Kështu në zbatim të këtij ligji, prokurori ka vendosur arkivimin e vendimit të marrë ndaj meje më datë 07.06.2005.
