Në moshën 63-vjeçare, Demi Moore duket se ka hyrë në një nga kapitujt më të lirë dhe më të qetë ...
AKTUALITET
EMRAT/ Një i vdekur dhe një i plagosur. Kush ishte shënjestra e atentatit në Gjirokastër?
PiranjatPërditësimi i fundit 11 Tetor 2026, 09:11
Një shpërthim me lëndë plasëse tritol ka tronditur Gjirokastrën mbrëmjen e kaluar.
Ngjarja ka ndodhur rreth orës 22:00 në bulevardin “18 Shtatori” në qendër të qytetit, ndërsa Beqir Devolli 45-vjeç, i cili drejtonte automjetin tip “Benz” që u hodh në erë, ka ndërruar jetë në ambulancë, gjatë transportimit drejt Spitalit të Traumës në Tiranë.
Nga shpërthimi mbeti i plagosur edhe Rigers Mela, i cili, sipas informacioneve paraprake, ndodhet jashtë rrezikut për jetën.
Viktima Beqir Devolli
Detajet e publikuara tregojnë se shpërthimi ndodhi pranë Gjykatës së Gjirokastrës dhe Komisariatit të Policisë.
Pas shpërthimit, automjeti humbi kontrollin, vijoi lëvizjen dhe përfundoi mbi trafikndarësen, përpara Drejtorisë Vendore të Policisë.
Pamjet nga vendi i ngjarjes tregojnë dëmtime të konsiderueshme në automjet, ndërsa shpërthimi u dëgjua në një pjesë të madhe të qytetit.
Fillimisht, hetuesit shqyrtuan edhe mundësinë e një shpërthimi nga impianti i gazit.
Por raportimet e mëvonshme treguan se automjeti përdorte naftë, ndërsa dyshimet u përqendruan te vendosja e një sasie lënde plasëse.
Burime jozyrtare të policisë, të cituara nga mediat, raportuan se lënda plasëse dyshohet të ketë qenë tritol.
Një nga pistat që po shqyrtojnë hetuesit është aktivizimi i saj në distancë, por deri tani nuk ka një konfirmim zyrtar për mekanizmin e shpërthimit apo sasinë e eksplozivit.
Një detaj tjetër që merr rëndësi për hetimin është një ngjarje e mëparshme, ku përfshihej Rigels Mela.
Në prill të vitit 2025, automjeti i tij tip “Range Rover” u përfshi nga flakët ndërsa qëndronte i parkuar në lagjen Dunavat të Gjirokastrës. Banorët e zonës njoftuan autoritetet pasi konstatuan zjarrin, ndërsa nga ngjarja nuk pati persona të lënduar.
Ndërkohë viktima Beqir Devolli, njihej edhe me nofkën “Çilo hundëderri.” Sipas informacioneve të para, dyshohet se merrej me trafik droge në Greqi, por në policinë e Gjirokastrës nuk rezulton asnjë dosje për të.
Në njoftimin e parë, Policia e Gjirokastrës deklaroi:
“Rreth orës 22:00, në bulevardin ‘18 Shtatori’, dyshohet se ka shpërthyer automjeti tip ‘Benz’, në pronësi të shtetasit B. D., i cili ishte në lëvizje. Si pasojë e shpërthimit, kanë mbetur të dëmtuar shtetasit B. D. dhe R. M., të cilët ndodhen në spital, nën kujdesin e mjekëve. Grupi hetimor ndodhet në vendngjarje dhe vijon punën për sqarimin e rrethanave të rastit dhe përcaktimin e saktë të shkakut të shpërthimit”.
Hetuesit duhet të përcaktojnë nëse autorët synonin Beqir Devollin, në pronësi të të cilit ishte automjeti, apo Rigels Melën, emri i të cilit lidhet edhe me incidentin e vitit 2025.
