Një përleshje e dhunshme ku përfshiheshin afërsisht 15 persona u regjistrua të shtunën në Athinë, Raportohet se pas ngja...
AKTUALITET
EMRI/ I riu shqiptar dënohet për shitje kokaine, justifikohet me bixhozin para gjykatës
PiranjatPërditësimi i fundit 24 Prill 2026, 20:12
Një 24-vjeçar shqiptar, i futur ilegalisht në Mbretërinë e Bashkuar në pjesën e pasme të një kamioni, do të deportohet në vendlindje pasi u dënua për shpërndarje të drogave të klasës A në jug të Essex-it.
Gjykatësja Samantha Cohen konstatoi se Alex Gjaci, pa adresë të qëndrueshme, kishte luajtur “një rol të rëndësishëm” në një rrjet droge në Southend. Mesazhet në telefonin e tij tregonin se ai raportonte te një bashkëpunëtor i regjistruar si “Andy”, duke dhënë informacione për numrin e shitjeve të drogës dhe fitimet e realizuara.
“Mesazhet tregojnë se ishit plotësisht i vetëdijshëm për përmasat e aktivitetit,” u shpreh gjykatësja, duke shtuar se atij i dërgoheshin kode postare dhe vendndodhje në hartë për të kryer shpërndarjen e drogës.
Sipas avokatit mbrojtës, i riu kishte shkuar në Britani pasi kishte krijuar një borxh prej 44 mijë paundësh nga lojërat e fatit në Shqipëri, të cilin nuk mund ta shlyente. Megjithatë, duke qenë se kishte hyrë ilegalisht në vend, nuk kishte kërkuar status ligjor dhe tashmë ishte dënuar me mbi një vit burg, ai do t’i nënshtrohet deportimit automatik.
Gjaci doli para Gjykatës së Kurorës në Southend të enjten (23 prill), ku u dënua për posedim kokaine me qëllim shpërndarjeje. Sipas prokurorit Harry Hewitt, policia kishte vënë re një automjet që lëvizte me shpejtësi në Southend më 20 janar dhe e kishte ndjekur. Automjeti ndaloi dhe një person tentoi të largohej me vrap, por u kap nga policia – bëhej fjalë për Gjacin. Ai kishte me vete tre qese me pluhur të bardhë, që rezultoi kokainë, si dhe mbi 200 paund para në dorë.
Avokatja mbrojtëse deklaroi se i riu kishte punuar herë pas here në ndërtim, me pagesë 80–100 paund në ditë, por të ardhurat nuk i mjaftonin për të jetuar, ndaj ishte përfshirë në shpërndarje droge. Sipas saj, ai ishte rekrutuar nga një tjetër shqiptar që e kishte kontaktuar jashtë një kafeneje. Gjykatësja theksoi se droga e klasës A “shkatërron jetët”, duke dëmtuar rëndë shëndetin fizik dhe mendor të përdoruesve, duke nxitur kriminalitetin në komunitete dhe duke shkatërruar edhe jetën e vetë shpërndarësve.
Ajo deklaroi se dënimi fillestar do të ishte tre vite burg, por për shkak të pranimit të fajit në fazë të hershme, dënimi u ul në dy vite. Gjithashtu, u urdhërua shkatërrimi i drogës së sekuestruar dhe dhurimi i parave të konfiskuara për fondin komunitar të Essex-it, në mbështetje të luftës kundër pastrehësisë. /PiranjatNews/
