Izraeli dhe Libani kanë rënë dakord për zbatimin e një armëpushimi, njoftoi Departamenti Amerikan i Shtetit përmes një...
AKTUALITET
Gjyqi ndaj ish-gjyqtarit Guxim Zenelaj shkon drejt konkluzioneve përfundimtare
n.fPërditësimi i fundit 11 Qershor 2024, 20:58
Foto ilustruese
TIRANË- Ish-anëtari i Gjykatës së Lartë, Guxim Zenelaj u përball me pyetje për pasurinë dhe konfliktin e dyshuar të interesit në procesin penal për deklarim të rremë të pasurisë. Ish-anëtari i Gjykatës së Lartë, Guxim Zenelaj u përball të martën më 11 qershor me pyetje të prokurores Doloreza Musabelliu lidhur me mospërputhjet në deklarimet e tij të pasurisë si dhe për gjykimin e çështjeve ku palë kishin qenë persona me të cilët kishte pasur marrëdhënie financiare.
Guxim Zenelaj u dërgua për gjykim në vitin 2022 dhe po gjykohet për veprën e deklarimit të rremë të pasurive. Në tetor të vitit 2023, Gjykata e Posaçme pranoi kërkesën e SPAK për konfiskimin e pasurive të Zenelajt, konkretisht të një ngastre toke me sipërfaqe 1000 m2 në Porto Palermo, Himarë dhe gjashtë pasuri të paluajtshme në Ishull-Shëngjin të Lezhës.
Gjatë seancës të martën, Zenelaj u pyet nga prokurorja Doloreza Musabelliu lidhur me gjykimin e një çështjeje ku palë kishte qenë një person nga i cili kishte marrë një hua. Ai deklaroi se për të kërkuar dorëheqje nga një çështje në kohën kur ai ushtronte funksionin në Gjykatën e Lartë, procedohej me kërkesë verbale drejtuar kryetarit.
Sipas tij, nëse kryetari refuzonte të lejonte dorëheqjen, atëherë kërkesa nuk formalizohej me shkrim dhe vijohej gjykimi – ndërsa kur jepte miratimin përgatitej edhe me shkrim.
Në vijim, Zenelaj dha shpjegime për mënyrën e përfitimit të një prone. Ai tha se nuk kishte pasur komunikim me palën tjetër dhe se të gjitha negocimet i kishte kryer bashkëpronari i truallit që zotëronin.
Për mospërputhjen e deklarimit të pjesës takuese në një shtëpi private, ai sqaroi se në vitin 2017 kishte bërë deklarim më të detajuar, duke shpjeguar se zotëronte 1/3 e banesës, ndërsa pjesa tjetër ishte pronë e dy vëllezërve. Ai shtoi se deklarimi i vitit 2003 ishte i pari dhe prandaj ka ndodhur dhe mospërputhja.
Musabelliu vërejti se subjekti kishte deklaruar si burime të banesës së ndërtuar në vitin 1996, të ardhura të fituara në vitin 2005. Zenelaj shpjegoi se ai i kishte përfunduar një pjesë të punimeve e mobilimin e banesës në vitet 2006 dhe 2007 dhe se të ardhurat e 2005-ës kishin shërbyer për këto investime.
Gjyqtarja Atalanta Zeqiraj konstatoi se ishte përfunduar shqyrtimi i provave dhe se duhet që procesi të vijojë me paraqitjen e kërkimeve përfundimtare. Prokurorja Doloreza Musabelliu kërkoi kohë për përgatitjen e konkluzioneve përfundimtare me shkrim dhe seanca u shty për më datë 26 qershor, në orën 14:00.
Zenelaj u largua nga sistemi gjyqësor në korrik të vitit 2017, së bashku me anëtarët e tjerë Arjana Fullani, Andi Çeliku Aleksandër Muskaj dhe Evelina Qirjako, të cilët njoftuan përfundimin e mandatit të tyre. Në vijim ata refuzuan t’i nënshtrohen procesit të rivlerësimit me pretendimin se nuk e kishin më statusin e magjistratit. Po ashtu refuzuan pozicionet në Apel.
Bazuar mbi këtë refuzim, KPK vendosi se secili prej tyre kishte bërë dorëheqje dhe bazuar në ligjin për rivlerësimin kalimtar, caktoi masën që u ndalon rikthimin në sistemin e drejtësisë për 15 vjet./BIRN
