Zjarri në zonën e Tërbunit në Pukë vijon prej tre ditësh, ndërsa flakët janë përhapur me shpejtësi t&eu...
AKTUALITET
Gjyqi ndaj Metës/ Cakrani: SPAK të kthjellohet, s’mund të zhbëhet karriera e tij
PiranjatPërditësimi i fundit 24 Qershor 2026, 16:32
Pas përfundimit të seancës gjyqësore të zhvilluar në GJKKO ndaj ish Presidentit Ilir Meta, avokati mbrojtës Kujtim Cakrani hodhi një sërë akuzash ndaj Prokurorisë së Posaçme, duke deklaruar se organi i akuzës ka konsumuar shkelje flagrante të Kushtetutës dhe ligjeve ndërkombëtare në lidhje me inkorporimin e provave në dosjen penale.
Cakrani theksoi se hetimi pasuror po injoron qëllimisht një pjesë të rëndësishme të karrierës politike të Metës.
Sipas tij, referimi i të dhënave vetëm nga periudha 2004-2022 pranë ILDKPKI-së, zhduk në mënyrë të pajustifikueshme funksionet e larta shtetërore që politikani ka mbajtur prej vitit 1992.
Cakrani pretendoi gjithashtu se nuk mund të fshihet fakti që Meta ka qenë kryeministër dhe ministër në disa dikastere, duke kërkuar që analiza financiare të përfshijë një pasqyrë të plotë të të ardhurave ndër vite.
Avokati foli edhe për dhe çështjen ÇEZ-DIA, ku tha se prokuroria ka përdorur dosjen e një procesi arbitrazhi për ta bërë pjesë të një procedimi penal në Shqipëri, një veprim që sipas tij bie në kundërshtim të plotë me Konventën e Nju Jorkut të vitit 1958.
“Analiza financiare pa dyshim që i referohet një institucioni administrativ siç është ILDKPKI-ja apo jo? Atëherë, nëse ti je referuar ILDKPKI-së nga viti 2004 deri në vitin 2022, atëherë ne do t’i referohemi dokumenteve që gjenden në Kuvendin e Republikës së Shqipërisë, në ministritë, në kryeministri se ai në vitin 2000 ka ushtruar funksionin e kryeministrit apo jo? Tani, ne do bëjmë sikur ai s’ka ekzistuar nga viti ’92 deri në 2004?
Tani si mund ta fshijmë ne që ai ka qenë kryeministër, ka qenë ministër i jashtëm, ka qenë ministër në shumë ministri që mua nuk më kujtohet? Si do t’ia bëjmë ne këtij halli? Prandaj ne kërkojmë që akti administrativ, po meqenëse po ta marrim ashtu, nëse arbitrazhi është një institucion që në Vjenë, se duhet ta theksoj këtë, që nuk lejon që dosja e atij të dalë e të bëhet pjesë e një procedimi penal në një vend tjetër, përse organi i procedurës e ka marrë atë dhe e ka inkorporuar në akuzë? Po flasim për arbitrazhin e Vjenës.
Po flasim që në ligjin, në Konventën e Nju Jorkut të vitit 1958 nuk lejohet absolutisht që të marrësh një dosje të një procesi arbitrazhi dhe ta inkorporosh atë në akuzë penale. Po ja që e ka bërë SPAK-u shqiptar këtë, në shkelje të Kushtetutës dhe të ligjeve ndërkombëtare. Tani, ne nuk i kërkojmë SPAK-ut… ne po kërkojmë që të kthjellohet, të analizojë prokuroria, të bindet dhe gjykata që klienti ynë ka pasur një karrierë të gjatë dhe padyshim ka të ardhurat e tij. Ne nuk po i kërkojmë që t’i heqin të ardhurat apo t’i shtojnë. Kërkojmë thjesht një veting, një veting administrativ, padyshim që analiza financiare është analizë që nuk ka lidhje me atë por, ka një rëndësi të veçantë që të inkorporohet në procesin penal.” – tha ai.
