Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Hapën zjarr ndaj policisë në Morinë, 168 vite burg për 7 të huajt
PiranjatPërditësimi i fundit 12 Shkurt 2026, 18:23
Gjykata e Posaçme kundër Korrupsionit dhe Krimit të Organizuar ka shpallur vendimin për një nga grupet më të rrezikshme të trafikut të emigrantëve të paligjshëm që operonin në territorin e Shqipërisë dhe Kosovës. Pas afro tre vitesh hetime dhe një procesi të zgjatur gjyqësor, shtatë shtetas të huaj janë dënuar me 168 vite burg në total.
Vendimi u dha sot pas pretencës së SPAK. Të pandehurit, pesë shtetas sirianë dhe dy algjerianë, akuzohen për pjesëmarrje në grup të strukturuar kriminal, tentativë vrasjeje ndaj punonjësve të Policisë së Shtetit, trafikim emigrantësh, armëmbajtje pa leje dhe ndihmë për kalim të paligjshëm të kufirit.
Sipas dosjes hetimore, më 25 maj 2023, gjatë një operacioni në pikën kufitare të Morinës, anëtarët e grupit hapën zjarr ndaj policisë kufitare në përpjekje për t’i shpëtuar arrestimit. Nga të shtënat u rrezikua seriozisht jeta e efektivëve dhe e banorëve të zonës.
Dënimet më të rënda, nga 35 vite burg secili, u dhanë për Sultan Grimash, Ayoub Bahhoo, Muhammed Radën dhe Muhammed Shehab. Ata u shpallën fajtorë për tentativë vrasjeje ndaj punonjësve të policisë, pjesëmarrje në grup të strukturuar kriminal, trafik armësh dhe organizim të kalimeve të paligjshme drejt vendeve të Bashkimit Europian.
Ndërkohë, Muhammed Nasir, Nagid Alabdalah dhe Rabi Lqadi u dënuan me masa që variojnë nga 8 deri në 12 vite burg, në varësi të rolit dhe përfshirjes së tyre në veprimtarinë kriminale.
Hetimet e SPAK zbuluan se grupi bashkëpunonte me rrjete të tjera kriminale në Greqi, Turqi, Kosovë, Serbi dhe Gjermani, duke organizuar kalimin e emigrantëve drejt vendeve të BE-së kundrejt pagesave të konsiderueshme. Disa prej të dënuarve rezulton se qëndronin në Shqipëri që prej vitit 2019, duke përdorur identitete të rreme për të shmangur ndjekjen penale.
