Në kulmin e protestave kundër projektit turistik në Zvërnec, kryeministri Edi Rama ka mbërritur këtë të premte në...
AKTUALITET
Helmimi i 56 studentëve të Akademisë së Sigurisë, Prokuroria kërkon sqarime nga AKU: Pse zhbllokuat aktivitetin e “Sori-al”?!
PiranjatPërditësimi i fundit 26 Maj 2026, 11:52
Në kuadër të hetimeve për helmimin e 56 studentëve të Akademisë së Sigurisë, Prokuroria e Tiranës i ka dërguar një shkresë të dytë Autoriteti Kombëtar i Ushqimit (AKU), duke kërkuar informacion të detajuar mbi arsyet e vendimit për zhbllokimin e aktivitetit të subjektit “Sori-al”, pasi më herët ishte marrë masa e bllokimit të tij.
Organi i akuzës kërkon të sqarojë procedurat dhe motivet që çuan në heqjen e bllokimit administrativ.
Prokuroria ka sekuestruar edhe kartelat e 56 studentëve të Akademisë së Sigurisë, të cilat më pas i janë deleguar për ekspertim Instituti i Mjekësisë Ligjore (IML), për verifikime të mëtejshme.
Sipas AKU-së, janë marrë mostra për higjienën ambientale dhe pajisjet e punës në kuzhinën e Akademisë së Sigurisë, si dhe në kuzhinën e Garnizonit të Forcave të Armatosura në Tiranë.
Analizat janë kryer në laboratorin e Referencës ISUV dhe rezultatet kanë dalë brenda normave të lejuara për treguesit e higjienës.
Pas këtyre rezultateve, AKU zhvilloi inspektime në ambientet e Akademisë së Sigurisë dhe në Garnizonin e Forcave të Armatosura.
Në përfundim të procedurës, AKU vendosi zhbllokimin e aktivitetit të subjektit “SORI-AL”. Gjithashtu, subjektit i është kërkuar të kryejë analiza autokontrolli për produktet e gatshme në ambientet e Garnizonit të Forcave të Armatosura, në zbatim të legjislacionit në fuqi.
Më 14 maj AKU njoftoi se nga analizat e kryera në laboratorin e referencës ISUV rezultoi se tetë prej mostrave ishin brenda normave të lejuara, ndërsa një mostër makarone, produkt i gatshëm i marrë në kuzhinën e Akademisë së Sigurisë, rezultoi jokonforme për shkak të ngarkesës mbi normë me bakteret Escherichia coli dhe Staphylococcus koagulaze pozitive.
Për këtë arsye, AKU vendosi ndërprerjen e aktivitetit për subjektin “SORI-AL”, me administratore Alma Tafani.
Gjithashtu, ndaj subjektit u vendos masë administrative me gjobë në vlerën 1.5 milionë lekë për tregtim ushqimi të pasigurt dhe shkelje të kushteve higjieno-sanitare.
