Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
AKTUALITET
Iu drejtua gazetares së 'Piranjave' me terma seksist, AGSH reagon ndaj ministrit Ervin Demo: Kërko ndjesë publike, sjellje e papranueshme
PiranjatPërditësimi i fundit 5 Tetor 2025, 10:05
Asociacioni i Gazetarëve të Shqipërisë (AGSH) ka dënuar qëndrimin e papërshtatshëm dhe seksist të ministrit të Pushtetit Vendor, Ervin Demo, ndaj gazetares së Piranjave, Luela Gaxhja, gjatë një pyetje që ajo i bëri, ministri Demo iu drejtua gazetares me fjalët: “Je shumë simpatike”, duke i shpërfillur pyetjen dhe duke minimizuar rolin e saj në punën e saj si gazetare.
AGSH e cilëson këtë koment si një sjellje të papranueshme, seksiste, dhe thekson se një ministër duhet të jetë shembull i respektit ndaj përfaqësuesve të medias dhe të adoptojë standarde të larta etike, duke shmangur çdo formë sjelljeje që mund të dëmtojë dinjitetin e gazetarëve, veçanërisht të gazetarëve vajza.
Asociacioni kërkon që Ministri Demo të kërkojë një ndjesë publike ndaj gazetares Luela Gaxhja dhe të reflektojë mbi sjelljen dhe gjuhën e tij në raport me mediat. AGSH gjithashtu i bën thirrje institucioneve shtetërore që të respektojnë rolin e gazetarëve si kontrollues të pushtetit dhe garantë të transparencës.
Deklarata e plotë nga Asociacioni i Gazetarëve të Shqipërisë (AGSH):
Në lidhje me komentet seksiste të ministrit të Pushtetit Vendor Ervin Demo ndaj gazetares Luela Gaxhja
Asociacioni i Gazetarëve të Shqipërisë (AGSH) dënon qëndrimin e papërshtatshëm të ministrit të Pushtetit Vendor, z. Ervin Demo, ndaj gazetares së emisionit investigativ “Piranjat”, Luela Gaxhja, të cilës gjatë një pyetje për një çështje me interes publik ai iu drejtua me fjalët: “Je shumë simpatike”.
Ky koment, përbën një sjellje të papranueshme seksiste, e cila tenton të zhvendosë vëmendjen nga pyetja profesionale e gazetares dhe ta reduktojë rolin e saj në terren. Një ministër i qeverisë shqiptare duhet të jetë shembull i respektit institucional dhe etik ndaj përfaqësuesve të medias, jo autor i sjelljeve që minojnë dinjitetin e gazetareve vajza.
AGSH rikujton se çdo formë e trajtimit, seksist apo poshtërues ndaj gazetareve, është në kundërshtim me standartet etikë, standardet e Këshillit të Europës dhe angazhimet e Shqipërisë për barazi gjinore dhe lirinë e medias.
Ne i bëjmë thirrje Ministrit Demo që të kërkojë ndjesë publike ndaj gazetares Luela Gaxhja dhe të reflektojë mbi gjuhën dhe sjelljen e tij në raport me mediat. Gjithashtu, u bëjmë thirrje institucioneve shtetërore që të respektojnë rolin e gazetarëve si kontrollues të pushtetit dhe garant të transparencës.
