Kërkoi lirinë, shtyhet seanca për ish-kryebashkiakun e Kukësit, Safet Gjici 

ELBASAN- Gjykata e Elbasanit vendosi të shtyjë për në datën 11 nëntor 2024, në orën 13:00, seancën për ish-kryebashkiakun e Kukësit, Safet Gjici. Mësohet se pala mbrojtëse tha se Gjici ka vuajtur 1.9 vite burg dhe i kanë mbetur 1.2 vite dhe se ndodhet në gjendje të rënduar spitalore duke kërkuar qëndrim në shtëpi.

Gjithashtu bëhet me dije se në sallë është paraqitur edhe raporti mjekësor mbi gjendjen e Gjicit. Nga ana tjetër, gjyqtarja e çështjes kërkoi që të gjitha provat e paraqitura nga avokati t’i nënshtrohen vërtetësisë dhe të silleshin të gjitha kartelat mjekësorë të Gjicit që nga koha e paraburgimit.

Safet Gjici u dënua më datë 7 shkurt të këtij viti nga shkalla e parë me 3 vite burg, në aplikim të gjykimit të shkurtuar në 2 vite, nën akuzën e “shpërdorimit të detyrës”. Gjici u vu në pranga fillimisht i akuzuar për "korrupsion pasiv", pasi dyshohet se ka favorizuar Alma Kaçin, duke i ofruar mbështetje financiare, me vendim të Këshillit Bashkiak, mbi një projekt për strehimin dhe kujdesin ndaj qenve endacakë në qytet. 

safet gjici