Kolegji i Posaçëm i Apelimit lë në fuqi vendimin për shkarkimin e prokurorit të Elbasanit, Alfred Sali

TIRANË- Kolegji i Posaçëm i Apelimit (KPA) la sot në fuqi vendimin e dhënë nga Komisioni i Pavarur i Kualifikimit për shkarkimin nga detyra më 22.07.2022, për shkarkimin nga detyra të prokurorit të Elbasanit, Alfred Sali, duke e nxjerrë atë përfundimisht nga sistemi i drejtësisë. Ky vendim ishte përfundimtar dhe me një efekt të menjëhershëm.

“Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Albana Shtylla relatore, Mimoza Tasi, Rezarta Schuetz, Sokol Çomo anëtarë, shpalli vendimin për çështjen nr. 46/2022, datë 19.10.2022, që i përket ankimit të subjektit të rivlerësimit Alfred Sali kundër vendimit të Komisionit të Pavarur të Kualifikimit nr. 555, datë 22.07.2022.

Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: Lënien në fuqi të vendimit nr. 555, datë 22.07.2022 të Komisionit të Pavarur të Kualifikimit, që i përket subjektit të rivlerësimit Alfred Sali. Ky vendim është përfundimtar dhe ka efekt të menjëhershëm”, thuhet në njoftimin e KPA-së.

Komisioni i Pavarur i Kualifikimit ka shkarkuar nga detyra prokurorin e Vlorës Alfred Sali. Sali, me funksion prokuror në Prokurorinë e Vlorës. Pas verifikime që KPK bëri në të trija kriteret, përkatësisht pastërtisë së figurës, aftësive profesionale dhe justifikimin e pasurisë. Sipas KPK ka rezultuar se sa i takon pasurisë, ka kryer deklarim të rremë si dhe janë konstatuar pasaktësi. Rezulton se Sali në 2014, në deklaratën e pasurisë pretendon se ka fituar në bastet sportive onlinë bet 355 me seli në Gilbraltar shumën prej 79 275 euro.

Prokurori në dëshminë e tij deklaron se ia ka dhënë hua babait të tij në vlerën e 56 mijë eurove. Sipas KPK, edhe pse prokurori ka pasur likuiditet, ka marrë kredi në mënyrë që nuk është arsyetuar qartë. Në përfundim rezulton se mos deklarimi i shumës prej 56 mijë euro, marrja e një kredie bankare dhe ekzistenca e një tjetër kredie edhe pas fitimit të lotarisë, vazhdonte të paguhej me një kredi tjetër, ngrenë dyshimin se shuma e parave të fituara në lojë fati duket se ka krijuar një deklarim të rremë.

Nga hetimet e KPK-së, ka rezultuar se ka pasur lëvizje bankare mes prokurorit dhe kompanisë së basteve ku evidentohet se ka qenë frekuentues i kësaj i këtij aktiviteti, duke cenuar figurën dhe integritetin e prokurorit.