Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
AKTUALITET
Korrupsioni, vlerësim risku sipas sektorëve nga pronat tek shëndetësia e tenderët
n.fPërditësimi i fundit 23 Korrik 2024, 11:06
Foto ilustruese
TIRANË- Qeveria synon të hartojë një vlerësim risku për sektorët më të rrezikuar për t’u ekspozuar ndaj sjelljeve korruptive. Në Strategjinë Ndërsektoriale Kundër Korrupsionit 2024-2030 të nxjerrë për konsultim nënvizohet se do të ketë një renditje të disa fushave që kanë prevalencë më të lartë.
“Kjo dukuri është veçanërisht e pranishme në sektorin e të drejtave të pronësisë, kujdesit shëndetësor dhe social, arsimit, prokurimeve publike, partneritetit publik-privat, taksave dhe doganave, të cilat kanë një ndikim të madh në Qeverisje, ekonomi dhe shoqëri në tërësi, veçanërisht në nivelin e besimit të publikut ndaj Institucioneve publike” thuhet në dokument.
I njëjti nënvizon se adresimi i risqeve të korrupsionit në sektorin e pronave është themelor për konsolidimin e një sistemi transparent dhe të përgjegjshëm për ofrimin efikas të shërbimeve kadastrale, ndërsa parandalimi i korrupsionit në sistemin e kujdesit shëndetësor dhe social është në përputhje me të drejtat themelore dhe sigurimin e aksesit të barabartë për kujdes shëndetësor cilësor.
“Kontrolli më i mirë i procedurave në shërbimet e ofruara nga administrata tatimore do të reduktojë evazionin fiskal, si dhe do të rrisë eficencën e monitorimit të veprimeve ose mosveprimeve të zyrtarëve në sektorin tatimor dhe përfshirjen e tyre në raste të abuzimit të detyrës.
Vlerësimi i riskut të korrupsionit në sektorin e prokurimeve publike dhe partneritetit publik-privat do të reduktojë gjithashtu problematikat që pengojnë investitorët, ndërsa parandalimi i korrupsionit në procedurat doganore, kontrollet dhe vlerësimet nga administrata doganore do të rrisin efiçencën e sektorit doganor” thuhet në dokument.
Një nismë e tillë e një vlerësimi të thelluar sipas autoriteteve parashikohet të përmirësojë korrupsionin në këto sektorë teksa do të kemi një panoramë më të detajuar të proceseve dhe procedurave më të ekspozuara ndaj korrupsionit, si dhe formave të shfaqjes së tij.
Strategjia vlerëson se për këtë qëllim, do të zhvillohet një metodologji e për kryerjen e vlerësimit të riskut të korrupsionit (e cila mund të përdoret gjerësisht në të gjitha institucionet), e përshtatur më pas për vlerësimet e riskut në secilin sektor veçanërisht të prirur ndaj korrupsionit./ Monitor
