Revolta kundër ndërtimeve në Zvërnec nuk është kufizuar vetëm brenda Shqipërisë. Dje dhe sot, shqiptarë që...
AKTUALITET
Kreu i ILD thyen rekord për emërimet. Artur Metani punëson plot 8 këshilltarë personalë. Avokati zbulon emrat dhe lidhjet politike e nepotike
PiranjatPërditësimi i fundit 11 Shtator 2025, 19:32
Kreu i Inspektoratit të Lartë të Drejtësisë, Artur Metani, i cili duhet të kontrollojë punën e gjyqtarëve dhe prokurorëve, ka të punësuar plot 8 këshilltarë. Avokati Arben Llangozi ka publikuar një listë me emra që Meta ka punësuar në institucionin e tij, shpesh të lidhur me emra politikë dhe figura publike përfshirë këtu djalin e gjyqtarit të “famshëm” Ardian Dvorani.
Denoncimi nga avokati Arben Llangozi
Institucioni i Inspektorit të Lartë të Drejtësisë, në vend që të jetë shtylla e transparencës dhe garantuesi i llogaridhënies në sistemin gjyqësor, është shndërruar në një çerdhe të nepotizmit, klientelizmit dhe pazareve politike nën drejtimin e Artur Metanit.
Artur Metani ka arritur të vendosë një “rekord institucional”: është i vetmi drejtues në Shqipëri që ka nevojë për plot 8 këshilltarë personalë. Jo se drejtësia shqiptare është aq e ndërlikuar, por sepse qokat duhen shpërndarë me kujdes. Në vend që ILD të jetë institucion i pavarur dhe garant i ligjit, është kthyer në një agjenci punësimi për bij, bija, bashkëshorte e njerëz të pushtetit.
Me këtë ritëm, nuk kemi më një Inspektor të Lartë të Drejtësisë, por një “Kryeinspektor të Qokave”, i cili, për të justifikuar detyrën, ka krijuar rreth vetes një kabinet nepotik që i kushton shqiptarëve miliona lekë në muaj. Ironia është se institucioni që duhet të kontrollojë shkeljet e gjyqtarëve e prokurorëve, është vetë shembulli më flagrant i shkeljes së parimeve të ligjit, meritokracisë dhe paanshmërisë.
Me 8 këshilltarë personalë, secili i paguar me 150.000 lekë neto në muaj nga taksat e qytetarëve, Metani ka ngritur një rrjet familjarësh dhe militantësh politikë që nuk kanë asnjë lidhje me meritën apo integritetin profesional.
Klajdi Dvorani, djali i gjyqtarit Ardian Dvorani, i cili është vetë subjekt kontrolli i ILD-së. Ky është konflikt interesi flagrant dhe provë e kapjes së institucionit nga interesa private.
Lindita Rusmaili, bashkëshortja e Ilir Rusmailit në KAS, emëruar si shpërblim për shërbime ndaj partisë në pushtet. Qokë e pastër politike.
Nensi Hoxha, vajza e rektorit Artan Hoxha, emëruar si shpërblim familjar, një tjetër shembull i përdorimit të shtetit si zyrë punësimi për të afërmit e të pushtetshmëve.
Diana Dervishi, bashkëshortja e Besnik Dervishit, Komisioner për të Drejtën e Informimit, duke dëshmuar lidhjet e hapura klienteliste që kanë kthyer institucionet në pronë private të një rrethi të ngushtë njerëzish.
Këto nuk janë thjesht emërime të gabuara. Janë shkelje të rënda të ligjit, abuzim me fondet publike dhe prova e kapjes totale të drejtësisë nga një kastë e korruptuar që shpërblen njëri-tjetrin me poste dhe privilegje.
Reforma në drejtësi, që iu shit shqiptarëve si shpëtim, sot ka përfunduar në maskaradë nepotike. Në vend që të luftojë korrupsionin dhe të heqë duart e politikës nga gjyqësori, ajo ka krijuar një rrjet të mbyllur ku sundojnë qokat, interesat familjare dhe urdhrat e partisë në pushtet.
Ne i bëjmë thirrje publike SPAK-ut dhe çdo institucioni të pavarur që të hetojë menjëherë këtë skandal. Heshtja është bashkëfajësi. Qytetarët shqiptarë nuk mund të paguajnë më miliona lekë në muaj për qokat dhe pazaret e Metanit dhe klanit të tij.Artur Metani dhe këshilltarët e tij nepotikë duhet të japin llogari para ligjit!
A mund të presin qytetarët drejtësi nga një Inspektorat i Lartë i Drejtësisë që është kthyer në “ILD e qokave”? Kur kreu i tij, Artur Metani, rrethohet me 8 këshilltarë të përzgjedhur jo për meritë, por për mbiemra të pushtetit dhe lidhje familjare, ky institucion humbet çdo besueshmëri dhe shndërrohet në vegël nepotizmi, jo në garant të ligjit.
