Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Kushëriri u gjet i vdekur në humnerë, ish-polici vë në lëvizje Prokurorinë e Shkodrës dhe tregon se pse e kanë vrarë
PiranjatPërditësimi i fundit 22 Tetor 2025, 20:58
Prokuroria e Shkodër ka nisur hetimet për vdekjen misterioze të Mirel Çokajt, trupi i të cilit u gjet më 18 shtator 2025 në një humnerë në zonën malore të Kelmendit, Malësia e Madhe.
Fillimisht ngjarja u raportua si një rrëzim aksidental, por më pas ishin familjarët e 40-vjeçarit dhe të afërmit ata të cilët ngritën një sërë dyshimesh mbi rrethanat e vërteta të vdekjes, duke bërë që hetimet të mos mbyllen por të vijojnë në një tjetër pistë.
Burime nga organi i akuzës bëjnë me dije se kërkesa për rihapjen e hetimeve është bërë nga Rifat Çokaj, kushëri i viktimës dhe ish-punonjës policie me eksperiencë, aktualisht banues në Shtetet e Bashkuara të Amerikës.
Ai ka kërkuar nga autoritetet që të shqyrtojnë sërish provat, pas mospërputhjeve të vërejtura në raportimin fillestar të ngjarjes.
Sipas dëshmive të familjarëve, Mirel Çokaj dyshohet se ishte përfshirë në një aktivitet të paligjshëm të kultivimit të kanabisit dhe ndodhej në një parcelë të tillë në momentet e fundit të jetës së tij, e cila ndodhet rreth një orë larg vendit ku u gjet trupi. Në këtë parcelë, policia më pas konstatoi dhe asgjësoi 780 bimë narkotike të llojit cannabis sativa.
Familjarët pretendojnë se konflikti për ndarjen e fitimeve mes bashkëpunëtorëve të mundshëm mund të ketë çuar në një përplasje fatale që ka përfunduar me shtyrjen e tij në humnerë.
Ata ngrenë gjithashtu dyshime të forta për zhdukjen e telefonit të viktimës, që sipas tyre mund të jetë fshirë ose eliminuar qëllimisht për të fshehur gjurmët dhe komunikimet e fundit.
Një tjetër element që ka shtuar dyshimet e familjes është fakti se Çokaj ishte planifikuar të kthehej në banesë dy ditë më vonë, ndërsa në ditën e ngjarjes kishte ndjekur një itinerar të pazakontë drejt parcelës, që nuk ishte rruga që ai përdorte zakonisht.
Lidhur me këtë ngjarje Prokuroria e Shkodër ka marrë në pyetjet familjarë dhe persona të cilët njihnin viktimën si dhe ishin në dijeni të aktivitetit me lëndët narkotike.
