Kryeministri Edi Rama ka vijuar sulmet ndaj protestuesve që prej javësh janë mbledhur në Tiranë kundër qeverisë së tij...
AKTUALITET
Linja hekurudhore Porto Romano – Sukth, ankimohet tenderi i projektit teknik, shkak dokumentet
PiranjatPërditësimi i fundit 23 Shkurt 2026, 14:34
Tenderi për hartimin e projektit të detajuar teknik të linjës hekurudhore Porto Romano–Sukth është ankimuar në Komisionin e Prokurimit Publik, me argumente që lidhen me dokumentet e procedurës.
Në këtë fazë, ankimimet zakonisht përqendrohen te kushtet dhe specifikimet e vendosura nga autoriteti kontraktor, për të cilat operatorët ekonomikë shprehin rezerva.
Procedura u hap në gusht të vitit të kaluar dhe mbetet ende e papërfunduar. Autoritet kontraktor është Autoriteti Portual Durrës, ndërsa specifikimet teknike përfshijnë edhe Hekurudhën Shqiptare.
Projekti konsiderohet me rëndësi strategjike në funksion të planeve për zhvendosjen e portit të Durrësit në Porto Romano, megjithëse këto plane duket se kanë mbetur pa zhvillime të reja.
Në tetor të vitit të kaluar u njoftua se fituesi i garës ndërkombëtare për portin e ri do të shpallej më 31 janar 2026, por më shumë se një muaj pas afatit nuk ka ende njoftim zyrtar.
Sipas dokumenteve të tenderit, linja hekurudhore nga lidhja me rrjetin ekzistues deri në hyrje të portit të Porto Romanos do të ketë gjatësi 7,879 metra.
Nga fillimi i trekëndëshit hekurudhor deri në fund të linjës, lëvizja e trenave parashikohet si vijon:
– Në hyrje të linjës së Porto Romanos, trenat do të kalojnë në dy ndërrues hekurudhorë që do të instalohen në linjën kryesore Durrës–Sukth, duke shënuar fillimin e trekëndëshit hekurudhor. Pas rreth 1.1 km në drejtim të Porto Romanos, trenat do të kalojnë në një ndërrues tjetër, i propozuar të jetë simetrik për shkak të funksionit të tij. – Më pas, treni do të përshkojë rreth 4.7 km deri në hyrje të stacionit të pranimit dhe nisjes.
– Pas daljes nga stacioni, do të përshkohen edhe rreth 1.1 km deri në hyrje të portit të Porto Romanos.
