Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
AKTUALITET
Lot krokodili? Armand Duka i del në krah tifozit të plagosur, por prej vitesh përplaset me TKZ-në
PiranjatPërditësimi i fundit 25 Tetor 2026, 15:41
Erjon Vishkulli ishte një prej pjesëmarrësve në protestën kundër qeverisë Rama, ku u plagos rëndë në sy nga plumbat e gomës të policisë. 28-vjeçari, pjesë e grupimit “Tifozat Kuq e Zi”, iu nënshtrua një ndërhyrjeje kirurgjikale, ndërsa plagosja e tij ka sjellë reagimin e Federatës Shqiptare të Futbollit.
Presidenti i FSHF-së, Armand Duka, reaguar publikisht per të riun dhe familjen e tij, duke deklaruar se Federata është e gatshme të ofrojë ndihmë konkrete për trajtimin dhe rikuperimin e tij.
“Më ka prekur thellë plagosja e rëndë e Erjon Vishkullit”, shkruan Duka, duke shtuar se “familja kuqezi është pranë tij”.
Por, përtej mesazhit të solidaritetit, reagimi i kreut të FSHF-së vjen në një kohë kur marrëdhëniet mes tij dhe grupimit “Tifozat Kuq e Zi” janë shoqëruar prej vitesh me përplasje të forta, thekson Piranjat News.
Pikërisht këtu lind pikëpyetja: A janë këto lot krokodili?
Piranjat News sjell në kujtesë se tifozët Kuq e Zi (TKZ) kanë shprehur vazhdimisht pakënaqësi dhe protestuar kundër kreut të FSHF-së, Armand Duka, përmes banderolave, thirrjeve në kor dhe bojkotimit të ndeshjeve.
Nga përplasjet me TKZ-në te mesazhi i solidaritetit
Një nga episodet më të forta të përplasjes mes Armand Dukës dhe TKZ-së u regjistrua në mars të vitit 2025. Pas 21 vitesh mbështetjeje të organizuar për Kombëtaren, grupimi denoncoi se për herë të parë nuk i ishin rezervuar biletat për ndeshjet e Shqipërisë, përfshirë sfidën me Andorrën.
Vendimi erdhi pas kundërshtimeve të TKZ-së ndaj bashkorganizimit të Kampionatit Evropian U-21 të vitit 2027 nga Shqipëria dhe Serbia. Tifozët e konsideruan lënien pa bileta si një formë hakmarrjeje për qëndrimin e tyre, ndërsa FSHF-ja e justifikoi ndryshimin me synimin për të garantuar mundësi të barabarta për të gjithë tifozët përmes shitjes online.
Protesta vijoi edhe më 24 mars 2025, përpara ndeshjes Shqipëri–Andorrë. TKZ-ja dhe grupimi “Illyrian Elite” protestuan para selisë së Federatës, ndërsa në stadium tifozët brohoritën kundër Dukës dhe braktisën tribunën vetëm pak minuta pas nisjes së ndeshjes.
Por Piranjat News shprehet se përplasjet nuk lidhen vetëm me biletat. Në deklarimet publike të TKZ-së, grupimi ka kritikuar mënyrën se si drejtohet Federata dhe ka kërkuar transparencë, duke kundërshtuar atë që e konsideron përjashtim të zërit të tifozëve nga vendimmarrja.
Duka: TKZ-ja nuk është e vetmja tifozëri që mbështet Kombëtaren
Në debatin për raportet mes Federatës dhe tifozëve është përmendur edhe qëndrimi i Dukës se TKZ-ja nuk është grupimi i vetëm që mbështet Kombëtaren. Ky është një tjetër element i kontrastit mes përplasjeve të mëparshme dhe mesazhit të tij të sotëm, ku e cilëson Erjonin pjesë të “familjes kuqezi”.
Piranjat News rikujton se, sot një prej pjesëtarëve të këtij grupimi ndodhet në spital pas plagosjes së rëndë gjatë protestës kundër qeverisë.
Por për Erjon Vishkullin nuk mjaftojnë fjalët. Mesazhet publike mund të shprehin solidaritet, por janë veprimet ato që tregojnë se sa larg shkon ky solidaritet./Piranjat News
