Morën peng një 20-vjeçar në Sheshin "Skënderbej" dhe e dhunuan, arrestohen 3 persona, në kërkim bashkëpuntori i tyre

Foto ilustruese

TIRANË - Tre persona janë arrestuar nga Policia në Tiranë dhe një tjetër është shpallur në kërkim pasi akuzohen se kanë mbajtur peng dhe kanë dhunuar një 20-vjeçar. Policia sqaron se ngjarja ka ndodhur në Sheshin "Skënderbej" ku fillimisht tre të rinjtë me iniciale D.B 36-vjeç, E.H 31-vjeç dhe H.P 19-vjeç në bashkëpunim me njëri tjetrin kanë marrë me forcë në “Sheshin "Skënderbej", një 20-vjeçar, ndaj të cilit kanë ushtruar dhunë në mënyrë të vazhdueshme.

Si pasojë janë arrestuar dy prej tyre ndërsa është shpallur në kërkim 19-vjeçari. Sakaq policia njofton se ka arrestuar edhe një person tjetër që ka patur dijeni për ngjarjen, por nuk e ka kallëzuar në Polici.

Njoftimi i plotë i policisë:

I hoqën lirinë një shtetasi dhe ushtruan dhunë ndaj tij, arrestohen 2 shtetas, shpallet në kërkim bashkëpunëtori i tyre. Gjithashtu, u arrestua 1 shtetas tjetër që ka patur dijeni për ngjarjen, por nuk e ka kallëzuar në Polici. 

Specialistët për Hetimin e Krimeve të Komisariatit të Policisë Nr. 1, pas kallëzimit të marrë ditën e sotme nga një 20-vjeçar, se 3 shtetas i kishin hequr lirinë dhe kishin ushtruar dhunë ndaj tij, menjëherë kanë organizuar punën për kapjen e tyre.

- u arrestuan shtetasit D. B., 36 vjeç, dhe E. H., 31 vjeç, dhe u shpall në kërkim shtetasi H. P., 19 vjeç, për veprën penale "Heqja e paligjshme e lirisë";

- u arrestua shtetasi T. K., 28 vjeç, për veprën penale "Moskallëzimi i krimit".

Shtetasit D. B., E. H. dhe H. P., dyshohet se për motive të dobëta, kanë marrë me forcë në sheshin, ndërsa shtetasi T. K. ka patur dijeni për ngjarjen, por nuk e ka kallëzuar atë në Polici.

Materialet i kaluan Prokurorisë.

arrestim policia tirane