Ashtu siç pritej, me të mbërritur te kryeministria, ka nisur përplasja mes policisë dhe protestuesve.
Kanë qenë kë...
AKTUALITET
Nga Tirana në Korçë, protesta për Zvërnecin merr përmasa kombëtare kundër Ramës
PiranjatPërditësimi i fundit 5 Qershor 2026, 19:08
Protesta në Korçë
Protesta kundër projektit turistik në Zvërnec po merr gjithnjë e më shumë karakter kombëtar, teksa kundërshtimi ndaj investimit në Pishë Poros është përhapur përtej Tiranës dhe ka gjetur mbështetje në disa qytete të vendit.
Pas tubimeve të përditshme në kryeqytet, protesta dhe aktivitete sensibilizuese janë zhvilluar edhe në Durrës, Elbasan dhe Korçë, ndërsa reagime janë regjistruar gjithashtu në Vlorë dhe qytete të tjera. Aktivistët e shohin këtë si një tregues se çështja e Zvërnecit nuk konsiderohet më vetëm një problem lokal, por një kauzë që lidhet me mbrojtjen e pasurive natyrore dhe publike në të gjithë vendin.
Sipas organizatorëve, zgjerimi i protestave tregon se revolta qytetare po kalon kufijtë e komuniteteve të prekura drejtpërdrejt nga projekti dhe po kthehet në një lëvizje më të gjerë kundër politikave që, sipas tyre, kanë favorizuar ndërhyrjet në zona të mbrojtura.
Ndërsa në Tiranë po mbahet protesta e gjashtë radhazi, aktivistët kanë paralajmëruar vijimin e mobilizimit edhe në qytete të tjera, duke synuar ta shndërrojnë kundërshtimin ndaj projektit në një reagim mbarëkombëtar.
Përkrah zgjerimit të protestave, organizatorët kanë artikuluar edhe pesë kërkesa drejtuar qeverisë, mes të cilave dorëheqja e saj, shfuqizimi i ligjit për investitorët strategjikë, anulimi i Paketës së Maleve, si dhe ndryshimet në ligjin për Zonat e Mbrojtura dhe trashëgiminë kulturore.
Për protestuesit, përhapja e reagimit në disa qytete është sinjali më i qartë se debati për Zvërnecin ka dalë tashmë nga kufijtë e Vlorës dhe është kthyer në një çështje me interes kombëtar.
