Në tregun e këmbimit valutor shqiptar, një dollar amerikan do të blihet sot me 81.5 lekë dhe do shitet me 82.5 lekë.
Ndërk...
AKTUALITET
Nga vjedhje tek dhuna në familje, arrestohet 13 persona në Tiranë
E.DPërditësimi i fundit 19 Shtator 2024, 10:25
TIRANË- 13 persona janë arrestuar në Tiranë për vepra të ndryshme penale. Mësohet se të arrestuarit kishin kryer vepra penale si "Vjedhja", "Mashtrimi", "Dhuna në familje" dhe "Drejtimi i automjeteve në mënyrë të parregullt".
Njoftimi i Policisë:
Tiranë/Arrestohen 13 shtetas, për vepra të ndryshme penale. Specialistët e Sektorit për Hetimin e Narkotikëve arrestuan shtetasin A. L., 19 vjeç, banues në Tiranë, pasi shërbimet e Policisë gjatë kontrollit fizik i gjetën dhe sekuestruan, në cilësinë e provës materiale, sasi lënde të dyshuar narkotike kokainë.
Specialistët për Hetimin e Krimeve në Komisariatin e Policisë Nr. 1 ndaluan shtetasit: I. P., 32 vjeç, dhe A. K., 31 vjeçe, të dy banues në Tiranë, të dyshuar për veprën penale "Vjedhja" kryer në bashkëpunim, parashikuar nga neni 134 e 25 i Kodit Penal. Këta shtetas në bashkëpunim me njëri-tjetrin dyshohet se kanë vjedhur produkte (pije alkoolike) në dy markete të ndryshme; G. T., 45 vjeç, banues në Tiranë, pasi Gjykata e Shkallës së Parë e Juridiksionit të Përgjithshëm Tiranë e ka dënuar me 4 muaj burgim për veprën penale "Vjedhja".
Specialistët për Hetimin e Krimeve në Komisariatin e Policisë Nr. 3 ndaluan shtetasit: D. B., 42 vjeç, banues në Tiranë, për veprën penale "Mashtrimi" parashikuar nga neni 143 i Kodit Penal; F. B., 24 vjeç, banues në Tiranë, për veprën penale "Plagosja e lehtë me dashje" parashikuar nga neni 89 i Kodit Penal.
Gjithashtu po nga këta specialistë u arrestua shtetasi E. V., 37 vjeç, banues në Tiranë, për veprën penale "Dhuna në familje", parashikuar nga neni 130/a i Kodit Penal, pasi dyshohet se ka ushtruar dhunë ndaj bashkëshortes së tij.
Specialistët për Hetimin e Krimeve në Komisariatin e Policisë Nr. 4 arrestuan për veprën penale "Dhuna në familje" shtetasit: V. K., 44 vjeç, banues në Tiranë, pasi dyshohet se ka ushtruar dhunë ndaj nënës së tij; R. M., 31 vjeç, banues në Tiranë, pasi dyshohet se ka ushtruar dhunë ndaj bashkëshortes së tij.
Specialistët për Hetimin e Krimeve në Komisariatin e Policisë Nr. 6 arrestuan shtetasin Sh. Sh., 27 vjeç, banues në Tiranë, pasi dyshohet se ka ushtruar dhunë ndaj nënës së tij. Specialistët e Komisariatit të Policisë Rrugore Tiranë ekzekutuan vendimin penal për shtetasin Xh. Q., 52 vjeç, banues në Tiranë, pasi Gjykata e Shkallës së Parë e Juridiksionit të Përgjithshëm Tiranë, e ka dënuar me 4 muaj burgim për veprën penale "Drejtimi i automjeteve në mënyrë të parregullt".
Gjithashtu po nga këta specialistë u arrestuan shtetasit: E. B., 29 vjeç, banues në Tiranë, pasi u kap duke drejtuar automjetin nën ndikimin e lëndëve të dyshuara narkotike; L. V., 46 vjeç, banues në Tiranë, pasi në autostradën Elbasan-Tiranë, duke drejtuar automjetin në gjendje të dehur, ka humbur kontrollin mbi drejtimin e tij dhe si pasojë është përplasur me trafikndarësen dhe një automjet tjetër. Si pasojë 46-vjeçari është dëmtuar dhe ndodhet jashtë rrezikut për jetën.
