Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Nisin fluturimet ajrore tre herë në javë mes Shqipërisë dhe Izraelit, ambasadorja Peleg: Kjo linjë do të forcojë më tej marrëdhëniet tona, bashkëpunimin ekonomik dhe turizmin
n.fPërditësimi i fundit 2 Prill 2025, 20:53
TIRANË- Në aeroportin Ndërkombëtar të Tiranës ditën e sotme kanë mbërritur pasagjerët e parë të linjes së ndërsjelltë mes Shqipërisë dhe Izraelit. Linja Sundor nisi fluturimet sot teksa pasagjerët shprehën entuziazmin pasi zbritën në aeroport teksa theksuan se do të zbulojnë një vend të ri.
Drejtor Operacional i TIA-s, Piervittorio Farabbi tha se kjo linjë është një urë që lidh jo vetëm dy shtete, por dy popuj. Farabbi shtoi se Izraeli është një treg me shumë interes për turizmin dhe shpresojnë që ky të jetë vetëm fillimi i një bashkëpunimi të suksesshëm.
Drejtor i Aviacionit Civil Shqiptar, Maksit Et’hemaj gjatë fjalës së tij theksoi se janë krenarë që sot mirëpritën një operator prestigjioz si Sandor El Al, si rezultat i një pune të përbashkët dhe të vazhdueshme. Sipas tij turistët izraelitë do të çojnë në vendin e tyre kujtime të bukura nga Shqipëria, dhe ky fluks pritet të vijë duke u rritur.
Ambasadore e Izraelit në Shqipëri, Galit Peleg theksoi se mes Izraelit dhe Shqipërisë ekzistojnë lidhje të veçanta, por tashmë ky fluturim direkt është një lidhje fizike.
"Nuk kam asnjë dyshim se Sandor Airlines do të sjellë më shumë qytetarë izraelitë në Shqipëri dhe do të çojë shqiptarë në Izrael. Kjo linjë do të forcojë më tej marrëdhëniet tona të ngushta, bashkëpunimin ekonomik dhe turizmin”, tha Galit Peleg.
Do të jenë tre fluturime në javë për dhe nga Tel Avivi, duke ofruar kështu më shumë mundësi udhëtimi për turistët, udhëtarët e biznesit dhe komunitetet shqiptare dhe izraelite.
