Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Oferta 325 milionë euro e Lufthansa për operatorin italian ITA pritet të miratohet nga BE
n.fPërditësimi i fundit 14 Qershor 2024, 07:45
Foto ilustruese
TIRANË- Investimi i Deutsche Lufthansa AG prej 325 milionë euro në operatorin ajror ITA Airways të Italisë pritet të miratohet nga Bashkimi Europian, duke i dhënë një dorë përpjekjeve së kryeministres Giorgia Meloni për të ulur borxhin e vendit të saj, sipas Bloomberg.
Autoriteti i konkurrencës i BE-së është duke hartuar vendimin që do ti jepte dritë jeshile miratimit, pasi Lufthansa dhe qeveria italiane zgjidhën pengesat e fundit që u kishin mbetur, sipas njerëzve të njohur me çështjen që folën në kushte anonimiteti.
Lufthansa paraqiti një paketë zgjidhjesh përfundimtare në fillim të kësaj jave, e cila ka qetësuar frikën e BE-së për ruajtjen e konkurrencës së ndershme, veçanërisht në rrugët me distanca të gjata. Kjo marrëveshje gjithashtu do të ndihmojë në uljen e çmimeve për konsumatorët, thanë personat në dijeni.
Autoritetet kanë kohë deri më 4 korrik për të vendosur mbi marrëveshjen. Burimet theksuan se përmbajtja e projektvendimit mund të ndryshojë ende përpara kësaj date.
Lufthansa dëshiron të marrë përsipër ish-Alitalia në dy faza për të fituar një terren më të fortë në një nga tregjet më të mëdha, por edhe më konkurruese të aviacionit në Europë. Marrëveshja është përballur me një shqyrtim të rreptë nga Komisioni Europian me bazë në Bruksel, veçanërisht efekti i saj në udhëtimet e gjata.
Pavarësisht se u kryen një sërë lëshimesh, transaksioni dukej se po shkonte drejt kolapsit pasi rregullatorët vazhduan të ngrinin shqetësime mbi ndikimin e tij në rrugët transatlantike. Por kohët e fundit, CEO i Lufthansa Carsten Spohr u shpreh me një ton optimist për rezultatin e hetimit në Bruksel.
Sipas kushteve të planit të shpëtimit, Lufthansa me bazë në Këln fillimisht do të blejë 41% të operatorit që mori nga shteti italian aktivitetin e flamurit të dështuar Alitalia, me një opsion për të blerë pjesën tjetër më vonë.
Shitja e ITA-s është një pjesë kyçe e përpjekjeve të Melonit për të përmbushur objektivin e privatizimit prej 20 miliardë euro. Qeveria e saj e krahut të djathtë, e cila erdhi në pushtet në vitin 2022 në një platformë pro-biznesit, po llogariste që të mos vazhdonte të paguante për të mbajtur fluturimet e ITA.
Ndërsa kryeministrat e Francës dhe Gjermanisë dolën me një rezultat negativ në zgjedhjet europiane të fundjavës së kaluar, Meloni në të kundërt fitoi më shumë pikë.
Lufthansa dhe ITA në Shqipëri
Si Lufthansa ashtu dhe ITA ushtrojnë aktivitetin e tyre me fluturime nga Rinasi. Sipas të dhënave nga Tirana International Airport, në vitin 2023, Lufthansa zinte 4% të tregut të fluturimeve, ndërsa ITA vetëm 1%. Në Shqipëri, tregu po dominohet gjithnjë e më shumë nga operatorët me kosto të ulët, me Wizz Air që kishte 61% të tregut në 2023 dhe RyanAir që po njeh rritje të shpejtë pas hyrjes në nëntor të vitit të kaluar.
