Kreu i grupit të PS-së, Taulant Balla, gjatë një prononcimi për gazetarët pas mbledhjes së Kuvendit ka folur për protest...
AKTUALITET
‘Po na shpopullojnë’/ Banorët e krahinës Dukat-Tragjas-Radhimë-Orikum, kërkesë ndërkombëtarëve: Ndaleni këtë krim!
PiranjatPërditësimi i fundit 3 Tetor 2025, 18:09
Një grupim banorësh të krahinës Dukat-Tragjas-Radhimë-Orikum, të mbledhur në një Kuvend Komunitar, kanë ngritur një thirrje urgjente drejtuar Gjykatës Europiane për të Drejtat e Njeriut, Gjykatës së Hagës për Krime kundër Njerëzimit dhe SPAK-ut, duke akuzuar qarqe politike dhe struktura shtetërore në Shqipëri për “krime të organizuara kundër komunitetit”.
Sipas tyre, prej më shumë se tre dekadash, e sidomos në vitet e fundit, banorët e zonës përballen me një presion të organizuar që synon shpërnguljen dhe shpopullimin e krahinës. Në dokumentin e tyre, banorët pretendojnë se institucione shtetërore, funksionarë publikë dhe grupe biznesmenësh po u mohojnë të drejtat themelore, duke përfshirë:
Të drejtën për konsultim publik në projekte që prekin jetën, shëndetin dhe pronat e tyre.
Të drejtën e pronësisë, të cilat, sipas tyre, po grabiten përmes falsifikimeve dhe presioneve.
Të drejtën për jetesë me identitet dhe dinjitet, duke i zhytur banorët në pasiguri e frikë.
Të drejtën e banimit, duke shembur ose kërcënuar me shembje shtëpitë e shumë familjeve.
Të drejtën për përfitimin e aseteve të zonës, si burimet e ujit në Tragjas, vijën bregdetare Radhimë -Orikum, Karaburunin dhe Parkun Kombëtar të Llogarasë.
Banorët theksojnë gjithashtu mungesën e infrastrukturës së denjë, duke përmendur rrugët e dëmtuara të Orikumit dhe pamundësinë e përdorimit të segmenteve rrugore në zonën e Dukatit, që sipas tyre përbëjnë rrezik real për jetën.
Në thirrjen e tyre, e cila i është bërë me dijeni edhe ambasadave të SHBA-së, BE-së, Mbretërisë së Bashkuar, Amnesty International dhe OKB-së, komuniteti i zonës shprehet se është “në prag të shpërbërjes totale”, pasi po detyrohet të shpërngulet për shkak të pamundësive ekonomike dhe presioneve të vazhdueshme.
“Po kërkojnë të na shkatërrojnë me dhunë dhe të na shpërndajnë në të katër anët e botës. Ne kërkojmë që të mbrohen të drejtat tona, të ndalet ky krim dhe fajtorët të dalin përpara drejtësisë”, thuhet në dokumentin e banorëve.
