Projekti “Let’s Talk Together About US24”/ Deklarata e Ambasadës amerikane: Është skemë mashtrimi, jini të kujdesshëm

foto ilustruese

TIRANË- Ambasada amerikane në Shqipëri ka reaguar në lidhje me një projekt të njohur me emrin “Let’s Talk Together About US24”. Ambasada bën të ditur se nuk ka asnjë lidhje me projektin në fjalë.

Sipas Ambasadës ky projekt është një skemë mashtrimi dhe u bën thirrje shqiptarëve të jenë të kujdesshëm ndaj çdokujt që ofron apo garanton udhëtime falas në SHBA apo edhe viza amerikane falas ose me kosto të ulët.

Deklarata e plotë:

Ambasada e SHBA është në dijeni të një të ashtuquajturi projekt të njohur si “Let’s Talk Together About US24.” Ky grup nuk ka asnjë lidhje me Ambasadën e SHBA, Departamentin e Shtetit të SHBA, Departamentin e Arsimit të SHBA, programet tona arsimore ose personelin e ambasadës. Shërbimi i Sigurisë Diplomatike i Departamentit të Shtetit të SHBA do të vazhdojë të punojë me Policinë e Shtetit teksa ajo heton përmasat e kësaj skeme mashtruese.
U bëjmë thirrje të gjithë shqiptarëve të jenë të kujdesshëm ndaj mashtrimeve që garantojnë udhëtime falas në Shtetet e Bashkuara, si dhe viza amerikane pa pagesë ose me kosto të ulët. Gjithashtu, i bëjmë thirrje kujtdo që të kontaktojë Ambasadën e SHBA nëse dyshon se ndonjë person ose organizatë përpiqet të paraqesë veten në mënyrë të gënjeshtërt si të lidhur me ambasadën.

ambasada