Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
AKTUALITET
'Republika e Bidonëve'/ Si parkohet karrigia, kolltuku para makinës
PiranjatPërditësimi i fundit 25 Shtator 2025, 16:50
Në Shqipëri, rrugët kanë dalë jashtë kontrollit të bashkive dhe janë futur nën juridiksionin e… bidonëve plastikë. Këto “forca të rendit” të improvizuara, të shoqëruara shpesh nga karrige të vjetra apo kolltuqe të lodhur, kanë një mision të qartë: të paralajmërojnë shoferët se ky vend parkimi është “asfalt privat”.
Shoferët e dinë mirë se nuk është thjesht një shaka. Mjafton të heqësh bidonin dhe të parkosh makinën aty, për ta gjetur më pas me gomën të shfryrë. Është ligji i heshtur i bidonit, një kod “mafie lagjeje”, që ka shndërruar hapësirën publike në fushë minash psikologjike.
Kjo praktikë, që ka marrë përmasa të gjera, më në fund ka sjellë edhe një reagim zyrtar. Policia Bashkiake e Tiranës njoftoi sot se do të ndërhyjë dhe do të marrë masa ndaj çdo individi që shkel ligjin duke bllokuar hapësirat publike:
“Hapësirat publike janë pronë e të gjithëve – jo e disa individëve! Vendosja e bidonave, karrigeve apo sendeve të tjera për rezervim të vendeve është e paligjshme, e padrejtë dhe cenon të drejtën e qytetarëve për përdorim të barabartë. Qyteti nuk është pronë private. Respekto ligjin dhe komunitetin tënd. Policia Bashkiake do të ndërhyjë dhe do të marrë masa ndaj çdo shkeljeje të tillë." shkruan Bashkia
Qytetarët e thonë hapur në komente: problemi nuk është plastika, por mentaliteti. Sa kohë që nuk ka gjoba reale, sanksione të forta, e pse jo edhe përballje me ligjin për ata që zaptojnë hapësirën publike, ky fenomen do të vazhdojë të lulëzojë.
Pra, sekuestrimi i bidonave është vetëm një fasadë. Në thelb, bashkia po lufton një sëmundje kronike me një aspirinë.
