Presidenti amerikan, Donald Trump, ka hedhur poshtë kritikat se lufta me Iranin zbuloi kufijtë e aftësisë së tij për të ush...
AKTUALITET
VIDEO/ Revoltë në Dardhë të Librazhdit, banorët shembin gardhin e një HEC-i: Na është bllokuar uji i pijshëm dhe për vaditje
PiranjatPërditësimi i fundit 14 Qershor 2026, 16:05
Tensione dhe incidente janë regjistruar këtë fundjavë në fshatin Dardhë, në Njësinë Administrative Hotolisht të bashkisë Librazhd, ku një grup banorësh, në shenjë revolte, kanë shembur gardhin rrethues të një hidrocentrali (HEC), duke e akuzuar administratorin e këtij HEC-i se aktiviteti i tij po u privon aksesin për furnizimin me ujin e pijshëm dhe atë të nevojshëm për vaditjen e tokave bujqësore.
Pamjet nga vendngjarja tregojnë banorët teksa ndërhyjnë në objekt, në një situatë të tensionuar që, sipas tyre, është pasojë e një problemi të mbartur prej kohësh dhe e mungesës së reagimit nga institucionet përgjegjëse.
Sipas pretendimeve të banorëve, konflikti lidhet me shfrytëzimin e burimeve ujore në zonën e njohur si “Gurra e Bardhë”. Ata deklarojnë se ka ekzistuar një marrëveshje e mëparshme me administratorin e HEC-it dhe institucionet vendore që gjatë sezonit të verës prioritet t’i jepej furnizimit të komunitetit me ujë për konsum dhe vaditje, por pretendojnë se kjo marrëveshje nuk është respektuar asnjëherë dhe gjatë këtij viti situata është rënduar ekstremisht keq.
Banorët ngrenë gjithashtu dyshime se gardhi rrethues i objektit është ndërtuar pa dokumentacionin përkatës ligjor dhe shprehen se, pavarësisht ankesave dhe kërkesave të vazhdueshme, nuk kanë marrë zgjidhje konkrete nga autoritetet.
Incidentet e kësaj të doele tregojnë keqmenaxhimin e burimeve natyrore dhe mungesën e balancës mes interesit publik dhe aktivitetit privat. Nga njëra anë, banorët e fshatit Dardhë argumentojnë se po mbrojnë një të drejtë jetike, atë të aksesit në ujë, ndërsa nga ana tjetër, dëmtimi i pronës ngre çështje që kërkojnë trajtim ligjor dhe institucional.
Deri në këto momente nuk ka një reagim zyrtar nga institucionet përgjegjëse lidhur me incidentin apo pretendimet e ngritura nga banorët. Pritet që autoritetet të verifikojnë rrethanat e ngjarjes, ligjshmërinë e pretendimeve dhe të ndërmarrin hapat e nevojshëm për sqarimin e situatës dhe shmangien e përshkallëzimit të mëtejshëm të konfliktit.
