Kryetari i Organizatës së Veteranëve të Luftës të UÇK-së, Hysni Gucati kërkoi dorëheqjen e ministres s&eum...
AKTUALITET
Rrëshqitja e dheut bllokon fshatin prej 3 muajsh, banorët apel për ndërhyrje urgjente
Piranjat NewsPërditësimi i fundit 24 Mars 2026, 12:47
Një denoncim ka mbërritur në redaksinë e Piranjave nga banorë të fshatit Tudan, në zonën e Elbasanit, të cilët prej më shumë se tre muajsh përballen me një situatë të rënduar infrastrukturore.
Sipas tyre, një rrëshqitje e dheut ka dëmtuar rëndë rrugën kryesore të fshatit, duke e bërë pothuajse të pakalueshme si për automjete, ashtu edhe për këmbësorë. Banorët shprehen se prej kësaj situate nuk arrijnë të çojnë makinat pranë banesave të tyre, ndërsa lëvizja e përditshme është kthyer në një sfidë serioze.
Rruga, me një gjatësi rreth 1.8 kilometra, raportohet se është lënë në gjendje të amortizuar, pa asnjë ndërhyrje konkrete për rikthimin e saj në funksion normal.
Denoncuesi thekson se, pavarësisht premtimeve të vazhdueshme se puna “do të nisë sot apo nesër”, deri më tani nuk është marrë asnjë masë. Sipas tij, edhe kryetari i njësisë administrative Tregan, Merkuri Kaçi, nuk ka ndërmarrë hapa për zgjidhjen e problemit.
Banorët apelojnë për ndërhyrje të menjëhershme, duke e konsideruar situatën të papranueshme dhe duke theksuar se shpresat e tyre tashmë janë drejtuar tek publikimi i rastit në media.
