Në kulmin e protestave kundër projektit turistik në Zvërnec, kryeministri Edi Rama ka mbërritur këtë të premte në...
AKTUALITET
Rrëshqitje masive e dheut, bllokohet aksi Ura e Shtrejtë-Prekal/ Autoritetet: Shmangin lëvizjet e panevojshme
PiranjatPërditësimi i fundit 3 Janar 2026, 14:16
Aksi rrugor Ura e Shtrejtë-Prekal është bllokuar plotësisht për qarkullim, pas një shembjeje të konsiderueshme të trupit të rrugës, e cila dyshohet se është shkaktuar nga rrëshqitja e dherave si pasojë e motit të përkeqësuar dhe reshjeve intensive të 48 orëve të fundit.
Shembja është konstatuar në vendin e quajtur “Shkallë Logje”, një segment problematik i këtij aksi, ku masa të mëdha dheu kanë rrëshqitur drejt rrugës, duke e bërë atë të pakalueshme dhe potencialisht të rrezikshme për çdo mjet apo këmbësor. Menjëherë pas sinjalizimit, në terren kanë ndërhyrë ekipet e Ndërmarrjes së Shërbimeve Publike të Bashkisë Shkodër, të cilat kanë vendosur sinjalistikën përkatëse dhe kanë bllokuar aksin, me qëllim shmangien e çdo rreziku për jetën dhe sigurinë e qytetarëve.
Sipas vlerësimeve paraprake, rrëshqitja e dherave lidhet drejtpërdrejt me ngopjen e tokës nga reshjet e dendura të shiut, të shoqëruara me ulje temperaturash dhe kushte të paqëndrueshme atmosferike që kanë përfshirë zonën gjatë dy ditëve të fundit. Autoritetet lokale bëjnë me dije se situata po monitorohet në mënyrë të vazhdueshme, ndërsa pritet një vlerësim më i detajuar teknik për shkallën e dëmtimit dhe ndërhyrjet që do të nevojiten për rikthimin e qarkullimit normal.
Si pasojë e këtij bllokimi, banorët e zonës së Prekalit dhe fshatrave përreth kanë aktualisht vetëm një rrugë alternative për lëvizje, përmes kalimit nga ana tjetër, në drejtim të Qafës së Thores. Ndërkohë, nga ana e Malit të Shoshit, qarkullimi mbetet i pamundur, pasi rruga është e bllokuar në zonën e Prekalit dhe nuk ofron asnjë mundësi kalimi. Bashkia Shkodër u ka bërë thirrje banorëve dhe drejtuesve të mjeteve që të shmangin lëvizjet e panevojshme në këtë zonë, deri në përmirësimin e situatës dhe marrjen e masave të nevojshme për stabilizimin e rrëshqitjes.
Po ashtu, këshillohet tregim i kujdesit maksimal dhe ndjekja e udhëzimeve të strukturave në terren, pasi ekziston rreziku që, në kushtet e motit të paqëndrueshëm, të ketë rrëshqitje të tjera dherash. Autoritetet lokale bëjnë të ditur se sapo kushtet atmosferike ta lejojnë dhe të përfundojë vlerësimi teknik, do të nisë puna për pastrimin e materialeve inerte dhe ndërhyrjen në trupin e rrugës, me synim rikthimin sa më të shpejtë të qarkullimit dhe garantimin e sigurisë për banorët e zonës.
