Dashi Do bëni edhe sakrifica sot ju te dashuruarit vetëm e vetëm qe te ruani një ambient sa me te ngrohte ne jetën tuaj ne çif...
BOTA
Shpërthim në hidrocentralin Ritom në Zvicër, dy persona në gjendje të rëndë
PiranjatPërditësimi i fundit 9 Shtator 2026, 15:10
Një shpërthim ka ndodhur këtë të mërkurë në hidrocentralin Ritom, në zonën e Piotës, në kantonin Ticino të Zvicrës, duke shkaktuar plagosjen e disa personave. Sipas informacioneve paraprake, dy prej të plagosurve ndodhen në gjendje të rëndë, ndërsa autoritetet vijojnë operacionin e shpëtimit dhe hetimet për zbardhjen e shkaqeve.
Mediat e huaja raportojnë se shpërthimi mund të jetë shkaktuar nga një problem elektrik në një transformator gjatë kryerjes së testeve. Megjithatë, shkaku zyrtar ende nuk është përcaktuar. Nga shpërthimi janë dëmtuar dhe shembur pjesë të ndërtesës, ndërsa përmasat e plota të dëmeve nuk janë bërë ende të ditura.
Nuk është e qartë nëse incidenti ndodhi në hidrocentralin e vjetër, i cili vijon të jetë në funksion, apo në objektin e ri që po ndërtohet pranë tij. Në vendngjarje është zhvilluar një operacion i gjerë, ku kanë marrë pjesë zjarrfikës, ekipe të specializuara të shpëtimit, ambulanca dhe një helikopter i shpëtimit ajror. Zona është rrethuar nga policia për të garantuar sigurinë.
Hidrocentrali Ritom lidhet me liqenin natyror të Ritomit, i cili përdoret si rezervuar për prodhimin e energjisë hidroelektrike që furnizon edhe Linjën Gotthard të Hekurudhave Federale Zvicerane. Ndërkohë, autoritetet po vijojnë hetimet për të përcaktuar rrethanat e sakta të shpërthimit.
