Detaje të reja kanë dalë në dritë nga ngjarja e rëndë e regjistruar mbrëmjen e 20 tetorit në zonën e Komun&e...
AKTUALITET
Shqipëria dërgon kontingjentin e parë të helikopterëve në misionin e NATO-s në Kosovë
PiranjatPërditësimi i fundit 21 Tetor 2026, 12:52
13 efektivë të Forcave të Armatosura nisen sot nga Baza Ajrore e Farkës për t’u bashkuar me misionin e NATO-s, KFOR, në Kosovë.
Është kontingjenti i parë shqiptar i helikopterëve që do të shërbejë në bazën amerikane “Bondsteel”, duke shënuar një hap të ri në kontributin e Shqipërisë në operacionet e Aleancës.
Njoftimi i plotë
Në Bazën Ajrore të Farkës u zhvillua sot ceremonia e përcjelljes së kontingjentit të parë shqiptar të helikopterëve që do të marrë pjesë në misionin e NATO-s, KFOR, në Kosovë. 13 efektivë të Forcave të Armatosura do të shërbejnë në bazën ushtarake amerikane “Bondsteel”.
Ministri i Mbrojtjes, Ermal Nufi, i cili mori pjesë në ceremoni, e vlerësoi këtë angazhim si dëshmi të profesionalizmit të ushtarakëve shqiptarë dhe të përgjegjësive që Shqipëria përmbush si aleat i përkushtuar i NATO-s.
“Kontingjenti që përcjellim sot është pjesë e kësaj përpjekjeje. Ai dëshmon se Forca Ajrore po zgjeron rolin e saj dhe se Forcat tona të Armatosura po konsolidojnë kapacitetet për të përmbushur detyra gjithnjë e më të rëndësishme në kuadër të NATO-s,” tha ministri Nufi.
Sipas tij, misioni ka një rëndësi të veçantë për Shqipërinë, jo vetëm për shkak të lidhjes vëllazërore dhe historike me Kosovën, por edhe sepse siguria dhe stabiliteti i Kosovës lidhen drejtpërdrejt me paqen dhe sigurinë e Shqipërisë dhe të gjithë rajonit.
“Në këtë kuadër, angazhimi ynë në KFOR mbetet i palëkundur! Dhe ne jemi plotësisht të përkushtuar që të vijojmë të përmbushim përgjegjësitë tona me seriozitet, në bashkëpunim të ngushtë me aleatët dhe partnerët tanë, në shërbim të sigurisë së përbashkët,” u shpreh ministri.
Nufi theksoi se kontributi i Shqipërisë në sigurinë ndërkombëtare nuk kufizohet vetëm në këtë mision, por është pjesë e operacioneve të NATO-s, Bashkimit Evropian dhe Kombeve të Bashkuara.
Në ceremoni ishin të pranishëm Shefi i Shtabit të Përgjithshëm të Forcave të Armatosura, Gjenerallejtënant Arben Kingji, Komandanti i Forcës Ajrore, Gjeneral Brigade Voci, komandantë dhe drejtues të tjerë të Forcave të Armatosura, si dhe familjarët e efektivëve që nisen në mision./ Piranjat News
