Qytetarë të moshuar, shumica prej tyre me probleme shëndetësore, kanë ngritur zërin sot për radhët e gjata që duh...
AKTUALITET
Shqipëria e 9-ta në botë për Sigurinë Kibernetike? Raporti u hartua me informacionet e Edi Ramës
PiranjatPërditësimi i fundit 21 Mars 2026, 11:57
Një organizatë qeveritare estoneze, e cila mat indeksin global të Sigurisë Kibernetike bazuar vetëm mbi dokumenta shtetërorë, e ka renditur Shqipërinë në vendin e nëntë në botë.
Këtë rezultat e ka ndarë në rrjete sociale kryeministri Edi Rama, mëngjesin e së Enjtes, shoqëruar me komentin me nota euforike: “Sipas raportit, Shqipëria vlerësohet për progresin në forcimin e strukturave përgjegjëse për sigurinë kibernetike, zhvillimin e politikave dhe strategjive kombëtare, si dhe për përmirësimin e mekanizmave të koordinimit dhe reagimit ndaj kërcënimeve në hapësirën digjitale”.
Në foto: Postimi i Edi Ramës për Indeksin e Sigurisë KibernetikeNë foto: Postimi i Edi Ramës për Indeksin e Sigurisë Kibernetike
Raporti për vitin 2026 është përgatitur nga Indeksi Kombëtar i Sigurisë Kibernetike (NCSI), një organizatë me qendër Talin, e mbështetur nga qeveria e republikës balltike të Estonisë dhe që është e kritikuar pasi bazon të dhënat e saj vetëm mbi dokumenta zyrtare.
“Akademia e-Governance”, një organizatë lider në fushën e transformimit dixhital dhe një nga mbështetëset e Indeksit Kombëtar të Sigurisë Kibernetike (NSCI), thotë se: “NCSI mat ekzistencën e legjislacionit, njësive dhe dokumenteve strategjike, në vend të efektivitetit praktik të këtyre masave në terren. Kjo mund të nënkuptojë që një vend me dokumentacion të lartë burokratik shënon rezultate më të mira se një vend me aftësi operacionale të forta dhe të papublikuara”.
Rezultati për Shqipërinë është surprizues, gati i pabesueshëm, në një moment kur vendi ka treguar defiçensa të mëdha në sigurinë kibernetike.
Pak ditë më parë, faqja zyrtare e Parlamentit të Shqipërisë u sulmua nga një grup “piratësh kibernetik”, të quajtur “Homeland Justice”, për të cilët autoritetet shqiptare thonë se janë të lidhur me shtetin e Iranit.
Në foto: Postimi i grupit “Homeland Justice” për marrjen e të dhënave kibernetike të Parlamentit ShqiptarNë foto: Postimi i grupit “Homeland Justice” për marrjen e të dhënave kibernetike të Parlamentit Shqiptar
Në një postim në rrjetin “Telegram”, grupi “Homeland Justice” tha se ka kopjuar të gjithë komunikimet elektronike mes deputetëve dhe stafit administrative të Parlamentit.
Kjo goditje kibernetike pason disa të tjera, më e madhja e shënuar në vitin 2022, ku të dhënat sensitive të qytetarëve shqiptarë ranë në duart e “Homeland Justice”. Ndërhyrja e paligjshme në të dhënat e Parlamentit shqiptar nxiti shumicën socialiste që të miratonte një Rezolutë, në të cilën autorizohej qeveria e Edi Ramës për të shpallur Iranin si “shtet që financon terrorizmin”.
Ndërkohë, një numër i konsiderueshëm portalesh qeveritare punojnë me ndërprerje të theksuara, duke krijuar vështirësi të mëdha në marrjen dhe përpunimin e të dhënave për qytetarët dhe bizneset.
Qeveria shqiptare thotë se mbi 90 përqind e shërbimeve publike kryhen nëpërmjet portalit e-Albania, e cila ka edhe një asistent elektronik, “Diela”, e ngritur në rangun e ministrit në kabinetin qeveritar të Edi Ramës.
Bllokimet e shpeshta të faqeve të internetit qeveritare, përfshirë edhe ato që kryejnë transaksione financiare për llogari të kompanive private, kanë krijuar vështirësi ekzistenciale në aktivitetin e përditshëm publik.
