Kreu i Grupit Parlamntar ka reaguar gjatë ditës së sotme pas publikimit të përgjimeve nga ish zëvendës kryeministri Arben A...
AKTUALITET
Shqipëria rritet vetëm në Tiranë, 7 qarqe drejt shuarjes natyrore
PiranjatPërditësimi i fundit 13 Shkurt 2026, 10:49
Megjithë rënien e fortë të lindjeve, shtesa natyrore e vendit mbeti në territor pozitiv në vitin 2025 pasi vdekjet pësuan tkurrje më të fortë.
Shifrat e fundit të INSTAT mbi shtesën natyrore të popullsisë (lindjet minus vdekjet) dëshmojnë për një krizë demografike që po godet më fort qytetet jashtë aksit Tiranë-Durrës.
Edhe pse në nivel kombëtar shtesa natyrore paraqitet me një trend rritës, ky rezultat është tërësisht i kushtëzuar nga pesha e madhe që zë kryeqyteti, ndërkohë që në pjesën më të madhe të vendit vdekjet i kanë tejkaluar lindjet.
Tirana mbulon krizën e rretheve
Qarku i Tiranës vazhdon të jetë i vetmi bastion i fuqishëm demografik në vend, me një shtesë natyrore pozitive prej 3,803 lindje më shumë se vdekje vitin e kaluar. Në kryeqytet është përqendruar popullsia në moshë riprodhuese të ardhura nga qarqet e tjera për mundësi më të mira pune dhe arsimimi.
Pas saj, renditet Durrësi me një shtesë modeste prej 501 personash, i ndjekur nga Kukësi (+213) dhe Dibra (+125), zona këto që historikisht kanë pasur norma më të larta lindshmërie, megjithëse edhe atje rritja po ngadalësohet.
Lezha ndodhet në pragun kritik të qëndrueshmërisë me një shtesë pothuajse zero (+4).
Juglindja dhe Jugu në “infarkt” demografik
Situata në lidhje me shtesën natyrore ndryshon rrënjësisht kur analizohet pjesa tjetër e vendit. Shumica e qarqeve kryesore të Shqipërisë, 7 prej tyre, rezultojnë me shtesë natyrore negative, duke konfirmuar se vdekshmëria po mposht lindshmërinë.
Qarku i Korçës mban rekordin negativ me -742 lindje se vdekjet, shifër që tregon një plakje të shpejtë të popullsisë. Fieri, dikur një nga qarqet më të populluara, vijon me shtesë natyrore negative -497. Qyteti bregdetar i Vlorës regjistron një humbje natyrore prej -454, ndërsa Berati ndodhet në kuotën -348 lindje më pak se vdekje.
Gjirokastra po shkon drejt një tkurrjeje të pandalshme me shtesë natyrore negative -323, ndërsa Shkodra, pavarësisht madhësisë së saj, shënon -247. Edhe qyteti industrial i Elbasanit ka kaluar në territor negativ me -120. Emigrimi masiv i të rinjve ka lënë pas një popullsi të moshuar, ku vdekshmëria është e lartë dhe vullneti për të krijuar familje të reja është i ulët për shkak të pasigurisë ekonomike në periferinë e vendit.
Nëse ky trend vazhdon, brenda dekadës së ardhshme, shumë prej këtyre qarqeve do të përballen me mungesë akute të krahut të punës dhe me një rënie të mëtejshme të shërbimeve bazë, duke e kthyer Tiranën në qytet-shtet në një vend që po shuhet në mënyrë natyrale./Monitor
