Kryetari i PD-së, Sali Berisha i bëri thirrje maxhorancës të anulojë një anti-miting të paralajmëruar për ta mbaj...
AKTUALITET
"SPAK mbahet me buxhetin e shtetit", drejtoresha e Open Data Albania: Ja cfarë ndihme jep SHBA për Prokurorinë e Posaçme
r.llPërditësimi i fundit 30 Janar 2025, 09:01
spak
TIRANË- Aranita Brahaj, drejtoresha ekzekutive e Open Data Albania është shprehur se ndihma e SHBA për SPAK ishte dhënë përmes trajnimeve, ekspertizave dhe shkëmbimeve. Sipas Brahajt, kjo ndihmë e ndërprerë përkohësisht tani duhet të japë rezultatet e saj. Ajo u shpreh se SPAK-ut nuk i mungon logjistika nga buxheti i shtetit.
"SPAK-u ka marrë gjithë buxhetin që ka argumentuar gjatë shqyrtimit të buxhetit për vitin 2025 në parlament dhe të gjitha forcat poltike nuk kanë pasur ndonjë kontestim se pse SPAK-u s'duhet të ketë infrastrukturën buxhetore për të pasur zyra, sigurime shoqërore, pagat apo fondet e tyre të investimit. Ndihma nga SHBA është trajnime, asistencë që ka të bëjë me ekspertizë, me shkëmbime. Dhe kjo lloj ndihme nëse është dhënë për një farë kohe duhet të japë rezultatin dhe impaktin, sikurse logjistika nuk i mungon SPAK-ut as nga buxheti i shtetit. Ky është një vendim vetëm për një ndërprerje të përkohshme dhe një lloj vlerësimi, i cili do të bëhet nga strukturat e administratës", u shpreh ajo në studion e emisionit "Debat" në A2cnn.
Një ditë më parë, ambasada Amerikane në Tiranë u ka nisur një notë diplomatike institucioneve më të larta shqiptare, ku njoftohet ndërprerja me efekt të menjëhershëm e mbështetjes dhe fondeve, deri në një rishikim të dytë. Ky njoftim vjen pas Urdhrit Ekzekutiv të firmosur nga presidenti amerikan Donald Trump lidhur me ndihmën në vendet e huaja.
Sipas njoftimit të publikuar nga mediat, Ambasada e Shteteve të Bashkuara të Amerikës i paraqet qëndrimin e saj Ministrisë për Evropën dhe Punët e Jashtme të Shqipërisë dhe dëshiron të informojë Qeverinë shqiptare për qëllimin e Urdhrit Ekzekutiv të Qeverisë së SHBA-ve për të ndërprerë zbatimin, detyrimet e reja dhe disbursimet e fondeve në pritje të rishikimit të të gjitha programeve të ndihmës së huaj. Sipas informacioneve, partnerët e programit dhe zbatuesit e programeve të asistencës të financuara nga SHBA-të në Shqipëri janë duke u njoftuar për këtë veprim.
Ambasada Amerikane në Tiranë reagoi lidhur me njoftimin e shpërndarë nga mediat për ndalimin e fondeve nga SHBA për institucionet shqiptare, ku tha se vendimi është marrë në përputhje me Urdhrin Ekzekutiv të Presidentit Donald Trump për rivlerësimin dhe riorganizimin e ndihmës ndërkombëtare të Shteteve të Bashkuara. Ambasada i referohej deklaratës për shtyp të Zëdhënëses së Departamentit të Shtetit, Tammy Bruce, të datës 26 janar e cila thotë ndër të tjera se mandati i popullit amerikan ishte i qartë dhe se duhet të ripërqendrohen në interesat kombëtare amerikane. Në reagim thuhej se departamenti dhe USAID-i e marrin shumë seriozisht rolin e tyre si kujdestarë të dollarëve të taksapaguesve.
