Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
AKTUALITET
Takim me Shoqatën Shqiptare të Bankave, Sejko: Sektori bankar duhet të mbështesë më shumë biznesin e vogël dhe të mesëm
n.fPërditësimi i fundit 19 Dhjetor 2024, 14:15
Sejko
TIRANË- Pavarësisht ritmeve të rritjes së kredidhënies, kredia për sektorin privat është relativisht e ulët në krahasim me vendet homologe të rajonit, gjë që tregon potencial të pashfrytëzuar në mbështetjen e bizneseve dhe individëve. Guvernatori i Bankës së Shqipërisë, Gent Sejko, tha në takimin e fundvitit me Shoqatën Shqiptare të Bankave, se, duke marrë në konsideratë specifikat e ekonomisë shqiptare, rëndësi të veçantë merr sektori i biznesit mikro, të vogël dhe të mesëm, si segmenti kryesor i bizneseve aktive në Shqipëri. Në objektivat për të ardhmen, Sejko megjithatë theksoi edhe nevojën për ruajtjen e nivelit të ulët të raportit të kredive me probleme.
“Rritja e shpejtë e kredisë e vërejtur gjatë muajve të fundit, përbën një rrezik potencial për cilësinë e kredisë në të ardhmen. Megjithë nivelin e ulët aktual të kredive me probleme, bankat duhet të mbajnë në vëmendje uljen e mëtejshme të huave të klasifikuara me probleme dhe të sigurojnë vlerësime rigoroze të rrezikut të kredisë në portofolet e tyre,” tha Sejko.
Guvernatori theksoi edhe nevojën për të promovuar më shumë përdorimin e monedhës vendase.
“Intensifikimi i përpjekjeve për nxitjen e përdorimit të monedhës Lek për depozitat dhe huatë do të reduktonte varësinë nga monedhat e huaja dhe ekspozimin ndaj rrezikut të kursit të këmbimit, si dhe do të nxiste efektivitetin e politikës monetare në vend,” tha ai.
Një tjetër çështje që kërkon angazhim më të madh nga sektori bankar, sipas tij, është përfshirja e kufizuar financiare. Një pjesë e popullsisë, veçanërisht në zonat rurale, mbetet e pashërbyer nga sektori bankar, duke reduktuar aksesin në kredi dhe shërbime të tjera financiare. Sejko theksoi se fokusi i shtuar nga bankat në komunitetet e pashërbyera dhe bizneset e vogla, është i rëndësishëm në terma të rritjes ekonomike dhe stabilitetit afatgjatë.
Një çështje shumë e rëndësishme, sipas Guvernatorit, është edhe transformimi digjital. “Adoptimi i teknologjive inovative nevojitet të përshpejtohet me ritme të krahasueshme me tregjet më të avancuara. Bankat duhet të vazhdojnë të investojnë në teknologji, duke theksuar nevojën për zgjidhje bankare digjitale për të përmirësuar përvojën e klientit, për të adresuar sfidat e sigurisë kibernetike dhe rritur besimin e klientëve në shërbimet online,” tha ai.
Sejko vuri në dukje edhe rrezikun e klimës dhe financat e gjelbra, duke shtuar se implementimi i Strategjisë Kombëtare për Rrezikun e Klimës dhe përputhshmëria e sektorit bankar me udhëzimet e reja për menaxhimin e rrezikut klimatik do të jetë në fokus të kërkesave të shtuara përgjatë vitit 2025. Banka e Shqipërisë inkurajoi bankat të rrisin financimin për projekte të gjelbra dhe të qëndrueshme.
Përafrimi me standardet e BE-së dhe acquis communitare do të vijojë edhe gjatë vitit të ardhshëm. Sipas Sejkos, vëmendje e veçantë nevojitet veçanërisht lidhur me përputhshmërinë me kërkesat dhe masat ndaj parandalimit të pastrimit të parave (PPP) dhe financimit të terrorizmit (PFT), të cilat kërkojnë përpjekje dhe investime të vazhdueshme, në kuadër të raundit VI të vlerësimit nga MoneyVAL për Shqipërinë.
Anëtarësimi në SEPA lehtëson pagesat e standardizuara në Euro përtej kufijve dhe Guvernatori kërkoi që sistemi bankar të angazhohet për të qenë plotësisht pjesë e sistemeve SEPA, duke investuar në teknologji, infrastrukturë dhe trajnime të stafit, me qëllim përmbushjen e kërkesave teknike dhe rregullatore. Ai nënvizoi edhe nevojën për më shumë shërbime me fokus klientin.
“Rritja e kënaqësisë së klientit përmes shërbimeve të personalizuara bankare, ndërmarrja e programeve të edukimit financiar dhe zgjidhjet konkurruese bankare janë parakushte për të forcuar rolin tuaj në ekonomi dhe arritjen e qëndrueshmërisë afatgjatë,” tha Guvernatori./ Monitor
