Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Taulant Muka kërkon rikthimin e aksesit në koleksionin e doktoraturave në Bibliotekën Kombëtare
PiranjatPërditësimi i fundit 24 Shtator 2025, 13:15
Taulant Muka i është drejtuar zyrtarisht Ministrisë së Turizmit, Kulturës dhe Sportit, Ministrisë së Arsimit dhe Bibliotekës Kombëtare, duke kërkuar rikthimin e aksesit publik në koleksionin e doktoraturave të depozituara në Bibliotekën Kombëtare. Ai thekson se ndalimi i hyrjes bie ndesh me ligjin shqiptar “Për bibliotekat”, ligjin “Për kërkimin shkencor, zhvillimin teknologjik dhe inovacionin”, si dhe me parimet e Shkencës së Hapur dhe angazhimet europiane të Shqipërisë. Sipas Mukës, mbyllja e aksesit shërben si mburojë për plagjiaturën, e cila është shndërruar në fenomen shqetësues në arsimin shqiptar. Ai kërkon rikthimin e menjëhershëm të transparencës, sqarim ligjor për kufizimin dhe diskutim të çështjes në Këshillin Kombëtar të Bibliotekave.
NJOFTIM PËR MEDIA
Tiranë, 24 shtator 2025 Sot i jam drejtuar zyrtarisht Ministrisë së Turizmit, Kulturës dhe Sportit, Ministrisë së Arsimit dhe Bibliotekës Kombëtare, me një kërkesë për rikthimin e aksesit publik në koleksionin e doktoraturave të depozituara në Bibliotekën Kombëtare të Shqipërisë. Për dijeni, letra i është dërguar gjithashtu Kryeministrit të vendit, z. Edi Rama, dhe mund ta gjeni bashkangjitur.
Gjatë kërkimit shkencor, u informova se hyrja në këto doktoratura është e ndaluar, gjë që përbën shkelje të ligjit shqiptar “Për bibliotekat” (nr. 8576/2000) dhe të ligjit “Për kërkimin shkencor, zhvillimin teknologjik dhe inovacionin” (nr. 109/2024). Ky kufizim bie gjithashtu ndesh me parimet e Shkencës së Hapur dhe me kapitujt e hapur me Bashkimin Europian për qasjen në informacion dhe publikime shkencore.
Kjo situatë vjen në një kohë kur plagjiatura është shndërruar në model vlerësimi në arsimin dhe akademinë shqiptare. Ndërkohë që vetë Kryeministri ka shpallur publikisht Shqipërinë si “atdheun e plagjiaturave”, institucionet përgjegjëse kanë zgjedhur të mbyllin aksesin në doktoratura, duke e bërë të pamundur transparencën dhe kontrollin e punimeve akademike.
Në kërkesën time i bëj thirrje institucioneve për:
Rikthimin e menjëhershëm të aksesit publik në doktoratura.
Sqarim zyrtar mbi bazën ligjore të kufizimit.
Diskutim të kësaj çështjeje në Këshillin Kombëtar të Bibliotekave.
Ky veprim është thelbësor për të garantuar integritetin akademik, transparencën dhe përmbushjen e angazhimeve europiane të Shqipërisë./piranjat.al
