Kreu i Partisë Demokratike, Sali Berisha, e cilësoi shpopullimin, ekonominë dhe ndikimin e krimit të organizuar si problemet kryesore me t...
AKTUALITET
“Të gjendet zgjidhje për problemin e sigurisë në gjykata”/ Vrasja e gjyqtarit Astrit Kalaja, BIRN: KLGJ i kërkon ndihmë Kuvendit
PiranjatPërditësimi i fundit 4 Shkurt 2026, 18:15
Të gjitha godinat aktuale të gjykatave rezultojnë me problematika të sigurisë, tha të mërkurën Ilir Rusi, kryetar i Këshillit të Lartë Gjyqësor, gjatë një dëgjese në Kuvend për këtë çështje.
Komisioni parlamentar për Nismat Qytetare, Bashkëpunimin dhe Mbikëqyrjen Institucionale ka nisur një proces konsultimesh me organet e drejtësisë për sigurinë në gjykata, disa muaj pas një krimi të paprecedent në ambientet e Gjykatës së Apelit, ku u vra me armë zjarri gjyqtari Astrit Kalaja në sallën e gjyqit.
Ngjarja shkaktoi tronditje dhe shqetësim për nivelin e sigurisë në gjykatat shqiptare dhe KLGJ kërkoi nga Kuvendi që t’i jepet zgjidhje ligjore dhe e përhershme këtij problemi, i cili nuk është i veçuar, por lidhet me infrastrukturën e godinave dhe mungesën e forcave të mjaftueshme policore për mbrojtjen e tyre.
“Ka gjykata në të cilat, edhe nëse ju na jepni një portë detektori, nuk ke ku ta vendosësh”, tha ndër të tjera ai, duke shtuar se zgjidhja nuk mund të realizohet vetëm me masa administrative.
“Ekzekutivi duhet të ndërtojë godina të dedikuara për gjykata”, sugjeroi më tej ai, ndërsa theksoi se institucionet nuk mund të fshihen pas paqartësive apo pasaktësive të një akti ligjor.
“Unë them që është çështje vullneti”, tha ai.
Më tej, Rusi njoftoi komisionin se KLGJ kishte ngritur disa grupe pune për këtë problem dhe njëri prej tyre po merrej me propozime ligjore për gjetjen e një zgjidhjeje afatgjatë.
Situata e sigurisë nuk u paraqit njësoj për godinat e prokurorive, pasi përfaqësues të Prokurorisë së Përgjithshme në dëgjese thanë se “niveli i sigurisë ishte i kënaqshëm”, edhe pse duheshin masa shtesë dhe shfaqej e njëjta problematikë me godinat e vjetra, ku infrastruktura e pamundësonte instalimin e pajisjeve të sigurisë.
Ministria e Brendshme pretendoi se kishte kryer rolin e saj sipas dispozitave ligjore në fuqi, duke i faturuar KLGJ-së përgjegjësinë për “politikat e sigurisë në gjykata”, por nga ana tjetër shprehu vullnetin për të zbatuar një protokoll të ri sigurie për gjykatat, nëse ai do të miratohet.
“Nuk ka hezitim Ministria e Brendshme për të marrë përgjegjësitë që i takojnë, por ato të bazohen në ligj për të pasur qëndrueshmëri”, tha zv.ministri Xhemal Qefalia.
Kryetari i komisionit, Fatmir Xhafaj, premtoi se Kuvendi do të luante rol për gjetjen e zgjidhjeve, duke kërkuar nga KLGJ që të dorëzonte propozimet për ndryshime ligjore dhe analizat e bëra prej saj për këtë çështje.
Xhafaj tha se një tryezë dialogu me organet e drejtësisë dhe ekzekutivin, si dhe një rezolutë parlamentare si instrument orientues dhe detyrues për angazhimet institucionale, do të pasonin dëgjesat në komision./ BIRN
