Theu arrestin shtëpiak dhe dhunoi vjehrrën, arrestohet në flagrancë 47-vjeçari në Korçë

foto ilustruese

KORÇË- Arrestohen dy persona në flagrancë dhe procedohen tre të tjerë në Korçë për vepra të ndryshme penale. Mësohet se R.B ka thyer arrestin shtëpiak duke dalë nga shtëpia pasi ishte dënuar me burg për vjedhje.

Një 47-vjeçar M.F është arrestuar pasi po ashtu ka thyer arrestin shtëpiak duke dalë nga shtëpia e duke shkuar tek banesa e vjehrrës së tij të cilën e ka dhunuar. Mësohet se 47-vjeçari është dënuar për veprat penale plagosja e lehtë dhe kundërshtimi i punonjësit të policisë.

Ndërkohë tre përsona janë proceduar të lirë për veprat penale dhuna fizike për motive të dobëta dhe hedhja e mbetjeve urbane në një parcelë toke.

Njoftimi i Policisë:

Drejtoria Vendore e Policisë Korçë

Komisariati i Policisë Korçë arrestoi në flagrancë shtetasit:

R. B., banues në fshatin Plasë, Maliq, pasi u kap jashtë banesës së tij, nga e cila kishte dalë në kundërshtim me vendimin e Gjykatës, e cila i kishte caktuar masën e sigurisë “Arrest në shtëpi”, për veprën penale “Vjedhja”;

M. F., 47 vjeç, banues në fshatin Moravë, Korçë, pasi dyshohet se ka shkuar disa herë tek banesa e vjehrrës së tij, e cila u pajis me urdhër mbrojtjeje, dhe dyshohet se e ka dhunuar atë. 47-vjeçari ka dalë nga banesa e tij, në kundërshtim me vendimin e Gjykatës, e cila i kishte caktuar masën e sigurisë “Arrest në shtëpi”, për veprat penale “Plagosja e lehtë” dhe “Kundërshtimi i punonjësit të policisë së rendit publik”.         

Komisariati i Policisë Pogradec referoi materialet në Prokurori ku filloi procedimi në gjendje të lirë për shtetasit:

E. B., 30 vjeç, banues në fshatin Buçimas, Pogradec, pasi në fshat, gjatë një konflikti për motive të dobëta, dyshohet se ka goditur me grushte shtetasin A. T;   

N. Ç., 32 vjeç, banues në Pogradec, pasi në lagjen nr. 2, Pogradec, në gjendje të dehur, dyshohet se ka goditur me grushte shtetasit E. B. dhe M. M.;  

E. Ll., 63 vjeç, banues në fshatin Gështenjas, Pogradec, pasi në aksin rrugor “Pogradec-Korçë”, në Qafë Plloçë, u konstatua duke hedhur mbetje urbane në një parcele toke, të cilën pretendon se e ka në pronësi.

korçë