Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
AKTUALITET
Alarm/ Mbi 10 mijë suplemente të skaduara dhe kontrabandë, administratori në kërkim
PiranjatPërditësimi i fundit 19 Shkurt 2026, 12:04
Një magazinë në Tiranë u kthye në epiqendrën e një operacioni të madh pas hetimeve proaktive të Prokurorisë së Tiranës.
Specialistët gjetën më shumë se 10.000 suplemente ushqimore dhe bimore, të cilat rezultuan të skaduara, pa pulla zyrtare dhe pa etiketa në gjuhën shqipe, duke ngjallur shqetësim për shëndetin publik dhe integritetin e tregut. Hetimet zbuluan se mallrat ruheshin për llogari të një kompanie me rrjet ndërkombëtar në fushën e reklamimit dixhital, ndërsa administratori i kompanisë, Jasmin Trebo, 53-vjeç nga Bosnja dhe Hercegovina, u shpall në kërkim.
Dy punonjës të magazinës po procedohen penalisht, ndërsa autoritetet vijojnë përpjekjet për kapjen e administratorit dhe dokumentimin e të gjitha veprimeve të dyshuara kriminale. Materialet e dorëzuara në Prokurori përfshijnë akuza të rënda: kontrabandë, ruajtje e mallrave kontrabandë, fshehje të të ardhurave dhe shpërndarje të ushqimeve të rrezikshme për jetën e njerëzve.
Operacioni, i koduar “Audienca”, tregon se kontrollet dhe hetimet proaktive mund të zbulojnë skema të fshehura që kërcënojnë sigurinë e konsumatorëve dhe tregun ligjor
Njoftimi i policisë:
Finalizohet nga Seksioni për Hetimin e Krimeve Ekonomiko-Financiare dhe Prokuroria, operacioni i koduar “Audienca”.
Zbulohet se në një magazinë në Tiranë, mbaheshin për llogari të një subjekti me aktivitet ndërkombëtar në fushën e reklamimit dixhital, suplemente të skaduara dhe të kontrabanduara.
Sekuestrohen mbi 10 000 suplemente ushqimore dhe bimore.
Shpallet në kërkim administratori i subjektit (shtetas nga Bosnja dhe Hercegovina), si dhe procedohen penalisht 2 punonjës.
Pas një hetimi me metoda proaktive, kryer në drejtimin e Prokurorisë së Tiranës, për të dokumentuar paligjshmëritë që kryheshin në magazinën në kryeqytet, të një subjekti me aktivitet ndërkombëtar në fushën e reklamimit dixhital, u finalizua operacioni i koduar “Audienca”.
Nga kontrolli i ushtruar në ambientet e subjektit, specialistët e Seksionit për Hetimin e Krimeve Ekonomiko-Financiare gjetën dhe sekuestruan aty, mbi 10 000 suplemente ushqimore dhe bimore të skaduara, pa pullën e Agjencisë së Barnave dhe pa atë të Ministrisë se Financave, si dhe pa etiketa në gjuhën shqipe.
Në vijim të veprimeve procedurale për rastin, u shpall në kërkim administratori i subjektit, shtetasi nga Bosnja dhe Hercegovina, J. T., 53 vjeç, si dhe u proceduan penalisht punonjësit që ishin në ambientet e subjektit, shtetasit J. G., 30 vjeç dhe M. Ç., 26 vjeç.
Punohet për kapjen e 53-vjeçarit.
Materialet procedurale iu referuan Prokurorisë së Tiranës, për veprime të mëtejshme, për veprat penale “Kontrabanda me mallra të tjera”, “Ruajtja apo depozitimi i mallrave kontrabandë”, “Tregtimi dhe transportimi i mallrave që janë kontrabandë”, “Fshehja e të ardhurave” dhe “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.
