Në prag të miqësores Shqipëri – Izrael, e cila do të mbahet sonte në stadiumin “Air Albania” të Tiran&...
AKTUALITET
Trafik armësh drejt Anglisë/ GJKKO dënon me 13 vite burg Adulla Hoxhajn dhe dy anëtarët e grupit
PiranjatPërditësimi i fundit 3 Qershor 2026, 16:58
Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka dhënë sot vendimin përfundimtar për anëtarët e një grupi të strukturuar kriminal të akuzuar për trafikim të armëve dhe municioneve.
Procesi i zhvilluar me rregullat e gjykimit të shkurtuar u shqyrtua nga trupa gjykuese e përbërë nga gjyqtarët Bib Ndreca, Rudina Palloj dhe Atalanta Zeqiraj. Me vendimin nr. 46, datë 03.06.2026, gjykata ka shpallur fajtorë tre prej të pandehurve, ndërsa ka liruar nga qelia një tjetër person të përfshirë në dosje pasi nuk u provuan akuzat.
Adulla Hoxhaj: U deklarua fajtor për tentativë trafikimi të armëve në kuadër të grupit të strukturuar kriminal, pjesëmarrje në grup kriminal, si dhe mbajtje pa leje të armëve të zjarrit, municioneve luftarake dhe armëve sportive të sekuestruara në banesën e tij më 1 gusht 2024. Gjykata e dënoi fillimisht me një masë të vetme prej 13 vitesh burg, por pas uljes së 1/3 nga gjykimi i shkurtuar, ai u dënua përfundimisht me 8 vite e 8 muaj burgim në një burg të sigurisë së lartë.
Admir Tutaj: U deklarua fajtor për tentativë trafikimi të armëve dhe municioneve si dhe pjesëmarrje në grupin e strukturuar kriminal. Pasi u bashkuan dënimet në 12 vite burg, aplikimi i gjykimit të shkurtuar e la dënimin e tij përfundimtar në 8 vite burgim.
Bojken Turtulli: U shpall gjithashtu fajtor për të njëjtat vepra penale si Tutaj (trafikim armësh mbetur në tentativë dhe grup i strukturuar kriminal). Edhe për të, dënimi prej 12 vitesh u ul në 8 vite burgim përfundimtar në burgun e sigurisë së lartë.
Ndryshe nga tre të mësipërmit, GJKKO ka vendosur deklarimin e pafajshëm për të pandehurin Rifat Avdiaj. Sipas gjykatës, nuk u provua që ai të kishte kryer veprat penale të trafikimit të armëve dhe pjesëmarrjes në grupin e strukturuar kriminal. Për rrjedhojë, trupa gjykuese urdhëroi heqjen e masës “Arrest në burg” (të caktuar që prej korrikut 2024) dhe lirimin e tij të menjëhershëm nga paraburgimi. Atij iu rikthyen edhe sendet personale të sekuestruara, mes të cilave disa copa druri dhe dy kokë çiftelie të gdhendura.
Gjykata ka urdhëruar konfiskimin e një arsenali të madh armatimi dhe sendesh ushtarake që iu kapën Adulla Hoxhajt gjatë arrestimit të tij në gusht të vitit 2024. Mes tyre bëjnë pjesë:
Pistoleta të markave “Zoraki”, “Taurus” dhe “Yavuz”, si dhe 6 pistoleta me mulli.
13 pistoleta me dorezë plastike pa pjesë lëvizëse dhe 3 pistoleta të cilave u mungonin pjesët.
1 armë zjarri gjysmë automatike (kallashnikov) e lyer me bojë të zezë dhe me tytë të prerë.
Sasi të mëdha karikatorësh (përfshirë krehra kallashnikovi dhe pushke) dhe qindra fishekë të kalibrave të ndryshëm (9mm, 10mm, 357 magnum, Smith & Wesson).
2 silenciatorë (gypa metalikë për eliminimin e zhurmës), 10 dylbi optike për armë speciale, pajisje lazer, pranga, elektroshok dhe një peshore elektronike.
Një helmetë ushtarake, veshje kamuflazh ushtarake dhe thika.
Nga ana tjetër, telefonat celularë të sekuestruar (Iphone, Samsung, Google, Nokia), laptopët HP dhe një njësi qendrore kompjuteri u vendos të lihen për llogari të një procedimi të ndarë penal. Hoxhajt iu kthye vetëm portofoli me 290 euro, 13.000 lekë dhe një kartë SIM e Kosovës.
GJKKO ka vendosur që pesë mjete motorike të sekuestruara të qëndrojnë në kuadër të hetimit pasuror dhe financiar. Bëhet fjalë për:
Një automjet Volkswagen gri, një Audi Q5 dhe një Toyota Rav 4.
Një automjet Volvo (në përdorim nga Hoxhaj) dhe një motoçikletë Honda.
Dokumente qarkullimi gjermane dhe një leje lundrimi peshkimi.
