Tregtimi i akulloreve kancerogjene në vend, reagon AKU: Është bllokuar dhe asgjësuar e gjithë sasia e këtij produkti

foto ilustruese

TIRANË- Autoriteti Kombëtar i Ushqimit (AKU) ka reaguar ditën e sotme lidhur me rastin e tregtimit të akulloreve të kontaminuara në vend. Akulloret e importuara nga Franca në Shqipëri, kishin përbërje oksid etileni i cili shkakton leuçemi dhe kancer.

Sipas reagimit mësohet se vendi ynë ishte ndër 47 vendet në botë të cilat ishin furnizuar me këto akullore, dhe se AKU brenda shtatë ditësh të marrjes së njoftimit për rastin ka kryer inspektimet dhe ka bllokuar e asgjësuar të gjithë sasinë e akulloreve kancerogjene.

Sipas gjetjeve produktet janë shitur kryesisht në: Tiranë, Durrës, Fier, Elbasan, Vlorë, Berat, Lushnje, Korçë, Shkodër, Sarandë, Krujë, Burrel, Peshkopi, Tropojë, Lezhë. Sipas auditimit rezulton se janë konsumuar 13.2 ton akullore me oksid etileni, nga 17,5 ton akullore që u blenë në total.

“Importet për këtë produkt sipas loteve të përcaktuara nga sistemi RASFF janë kryer gjatë periudhës nga data 01.03.2021 deri me 22.05.2021 (data para daljes së njoftimit nga sistemi RASFF me datë 31.07.2021). Brenda periudhës 7 ditore nga marrja e njoftimit, është kryer inspektimi në subjektet respektive dhe më pas është bllokuar dhe asgjësuar e gjithë sasia e këtij produkti”, informoi AKU.

aku akullore