U denoncua dje nga Berisha/ Procedohet penalisht pronari i lokalit në Peqin, iu gjetën fletë votimi dhe lista emërore të zgjedhësve

TIRANA- Kreu i PD-së, Sali Berisha ka denoncuar ditën e djeshme një rast si të dyshuar për krime zgjedhore në Peqin. Mësohet se ditën e sotme policia ka nisur procedimin penal për pronarin e lokalit me iniciale D.B, si edhe gjatë kontrollit i janë gjetur dhe sekuestruar 10 fletë të ngjashme me fletët e votimit, të paplotësuara e të dyshuara të falsifikuara, si dhe një listë emërore e zgjedhësve. Gjithashtu më tej bëhet me dije se gjatë kontrollit në banesën e të proceduarit, janë gjetur një pushkë e vjetër trofe dhe një pistoletë zhurmuese (sportive).

Specialistët për Hetimin e Krimeve të Komisariatit të Policisë Peqin, pas njoftimit të marrë më datë 22.05.2025, se në një lokal në fshatin Pekisht, ishin gjetur disa materiale të dyshuara zgjedhore, kanë shkuar menjëherë në adresën e dhënë, me qëllim verifikimin e rastit.

Gjatë veprimeve të kryera në vendngjarje, në bashkëpunim me Prokurorinë e Elbasanit, në lokalin e shtetasit D. B., janë gjetur dhe sekuestruar 10 fletë të ngjashme me fletët e votimit, të paplotësuara, të dyshuara të falsifikuara, si dhe një listë emërore e zgjedhësve. Gjithashtu, është sekuestruar portofoli i shtetasit D. B., me 280 000 lekë.

Më tej, gjatë kontrollit në banesën e shtetasit D. B., janë gjetur një pushkë e vjetër trofe dhe një pistoletë zhurmuese (sportive). Në vijim të veprimeve për rastin, specialistët për Hetimin e Krimeve të Komisariatit të Policisë Peqin referuan materialet procedurale në Prokurori, ku nisi procedimi penal për shtetasin D. B., për veprat penale “Falsifikimi i materialit zgjedhor dhe rezultateve të zgjedhjeve” dhe “Prodhimi dhe mbajtja pa leje e armëve të gjuetisë dhe sportive”. Materialet procedurale iu referuan Prokurorisë, për veprime të mëtejshme hetimore.