Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
AKTUALITET
Vilajeti në protestën pro-familjes: Fëmijët të mbrohen nga ndërhyrjet hormonale dhe axhendat ideologjike
PiranjatPërditësimi i fundit 1 Qershor 2026, 19:37
Në fjalën e tij në protestën pro-familjes, pastori Paulin Vilajeti u shpreh se në Shqipëri po rriten shqetësimet për politikat që prekin familjen tradicionale dhe rolin e prindërve në edukimin e fëmijëve.
Ai ngriti akuza ndaj asaj që e cilësoi si imponim i një axhende ideologjike, duke kundërshtuar ndërhyrjet hormonale tek të miturit dhe duke theksuar se fëmijët duhet të mbrohen nga vendime të pakthyeshme në moshë të hershme. Vilajeti kritikoi gjithashtu qasjen e qeverisë, duke pretenduar se vëmendja po largohet nga problemet sociale dhe ekonomike të qytetarëve, ndërsa në përfundim bëri thirrje për mbrojtjen e familjes dhe vlerave tradicionale në vend.
Pjesë nga deklarata:
Zoti ju bekoftë të gjithëve dhe është një kënaqësi e madhe që ne jemi këtu së bashku. Në fakt, ne jemi mbledhur sot jo se jemi thjesht kundër një agjende, por jemi mbledhur këtu për shkak se jemi pro atyre njerëzve që kjo agjendë do t’i kthejë në kavie. Në eksperimente të ndryshme, nëpërmjet të cilave këtyre njerëzve duhet t’u injektohet patjetër një ideologji e re.
Vëllezër dhe motra, ne jemi shqiptarë. Zoti nuk ka bërë gabim kur na ka krijuar ne shqiptarët. Dhe ne shqiptarët duhet të ngrihemi e të themi jo atyre që prekin nderin, prekin familjen, prekin fëmijët tanë!
Miq të mi të dashur, të heshtim është mëkat. Është koha që ne të ngrihemi kundër çdo lloj agjende që kërkon të prekë atë hartë, e cila nga veriu në jug është një hartë që është mbrojtur dhe kufijtë nuk janë rastësi, por është gjaku i të parëve tanë që na e ka dhuruar këtë hartë. Dhe ne në këtë pjesë duhet të jemi duke kërkuar me ngulm që besën që na e kanë lënë si trashëgimi në këtë tokë, të mos lejojmë të na e shkelë asnjë lloj ideologjie.
Miq të mi të çmuar, është e turpshme që ne të shikojmë hartën e bukur të Shqipërisë dhe ta shohim se si duan, me ngjyra të ndryshme, ta kthejnë në një zhgarravinë. Ne duhet të ngrihemi kundër zhgarravinave të ngjyrave të ndryshme. Ne duhet të themi se Shqipëria ka një ngjyrë: kuq e zi! Dhe kjo ngjyrë është ngjyra që e ka heroi ynë kombëtar, Gjergj Kastrioti.
Miq të mi të çmuar, jemi mbledhur sot këtu për shkak të një arsyeje, sepse duam të themi se jemi shqiptarë. Unë jam me origjinë nga Vermoshi, dhe ne në Vermosh kemi një shprehje që themi: uji në male është një ujë që buron i pastër si kristali, si drita e diellit, por pastaj ndotet në fushë nga lloje të ndryshme pisllëqesh.
Miq të mi të çmuar, Zoti e ka krijuar njeriun të pastër, le të mos lejojmë asnjë lloj agjende që ta ndotë njeriun duke vendosur brenda tij gjëra që janë kundër Zotit. Ne nuk jemi… unë nuk jam sot këtu thjesht për të qenë kundër, por jam këtu për të qenë pro moralit, pro dinjitetit njerëzor. Morali dhe dinjiteti njerëzor, miq të mi të çmuar, janë se ne shqiptarët që e trashëgojmë këtë tokë nuk duhet ta lejojmë në dorën e atyre që duan ta bëjnë një fushëbetejë të ideologjive të ndryshme. Sepse Shqipëria në shekuj ka qenë fushëbetejë e ideologjive të ndryshme. Sot duhet të jetë toka e shqiptarëve që të vendosin ata… me dinjitetin tonë ta mbajmë atë.
Vëllezër dhe motra, ne nuk jemi pakicë. Pakicë janë ata që duan të na imponojnë ne. Ne jemi shumica. Dhe nëse ne si shumicë ngrihemi e nuk heshtim, miq të mi të çmuar, ne do të jemi gjithmonë duke fituar.
Unë ju uroj mbrojtjen dhe bekimet e Perëndisë. Zoti i mbroftë fëmijët shqiptarë kudo që të jenë, meshkuj e femra, djem dhe vajza. Sepse Perëndia kur e krijoi njeriun e krijoi në shëmbëllimin e tij: mashkull dhe femër!
