Forcat e armatosura të SHBA-së dhe Izraelit po planifikojnë të rifillojnë sulmet ndaj Iranit pas zgjedhjeve të mesit të man...
AKTUALITET
Vrasja e Elis Roshkodolit/ Kush është Xhulio Malo, i riu që mori pjesë në vrasjen e efektivit Ibrahim Basha, mbështetës i ISIS
I.APërditësimi i fundit 6 Shtator 2024, 13:14
SHKODËR- 26-vjeçari Xhulio Malo është arrestuar ditën e sotme për pjesëmarrje në vrasjen e Elis Roshkodolit në Shkodër. I riu që dyshohet se ka marrë pjesë në atentatin e datës 30 gusht, është prangosur nga policia e Shkodrës dhe akuzohet për bashkëpunim në vrasje dhe sigurimin e mjeteve për të kryer vrasje. Por Malo nuk është emër i panjohur për autoritetet shqiptare.
Malo ishte i njohur si mbështetës i Shtetit Islamik ISIS. Ai cilësohej si një nga anëtarët e grupit të të rinjve, ish-ushtar i Gate Mahmutajt (i vdekur), në Lazarat. Po në Lazarat, Malo ka marrë pjesë në vrasjen e efektivit të RENEA-s Ibrahim Basha.
Si ndodhi vrasja e efektivit të RENEA-s?
Në orët e para të mëngjesit të 24 qershorit të 2015-ës, forcat e policisë së bashku me forcat speciale RENEA dhe FNSH, zbarkuan në Lazarat pasi kishin marrë informacion për një situatë problematike, ku kishte pasur edhe të shtëna armësh. Pas kontrolleve ata arrestuan shtetasin Xhulio Malo, i cili po qarkullonte me makinë pra qendrës së fshatit. Në makinë u gjetën municione të shumta dhe lëndë narkotike.
Forcat speciale, njoftuan kolegët e tyre që të shoqëronin Malon. Në momentin që furgoni po afrohej për të bërë shoqërimin e Malos, u qëllua ndaj tij me armë zjarri nga një distancë prej rreth 200 metrash. Si pasojë e të shtënave, mbeti i vrarë efektivi i policisë, Ibrahim Basha, ndërsa u plagosën efektivët Jetmir Isai dhe Perlat Hamitaj. Asokohe, Policia e Shtetit kishte nisur një aksion për spastrimin e grupeve kriminale të drogës në Lazarat dhe shkatërrimin e parcelave me kanabis.
Kush ishte Elis Roshkodol?
Viktima ishte person i njohur për autoritetet vendase dhe të huaja. Ka dyshime që 36-vjeçari ka qenë pjesë e grupit të Bajrave në Shkodër dhe ka kryer disa 'punë' për ata. Në dritë ka dalë dhe një ngjarje e ndodhur në vitin 2010 në Shkodër ku është plagosur Hysni Bregu. Plagosjen e ka kryer Roshkodol, për arsye që ende nuk janë zbuluar ndërkohë që Bregu është babai i 'të fortit' të Shkodrës, Barush Bregu.
Në vitin 2014 Roshkodoli rezulton i arrestuar së bashku me 13 persona të tjerë, kryesisht shqiptarë në Belgjikë. Në atë kohë ndaj tij rëndonin akuzat e grabitjes në Belgjikë. Po në Belgjikë, Roshkodoli dyshohet se ka plagosur një tjetër shkodran me mbiemrin Shema. Ndërkohë që në në 25 prill të vitit 2023, Roshkodoli ka nisur një sherr me pronarin e një klubi nate në Rumani. 36-vjeçari e ka plagosur me thikë dhe më pas është larguar nga vendi. Për këtë mbi Roshkodolin rëndojnë akuzat e plagosjes dhe është shpallur në kërkim nga autoritetet rumune.
