Ilir Selmanaj, një nga personat e akuzuar për përfshirje në çështjen e bujshme të vrasjes së ish-oficerit të Po...
AKTUALITET
Vrasja që tronditi Dukagjinin/ Detajet e reja si u ekzekutua në pritë 40-vjeçari Aleksandër Koçeku
PiranjatPërditësimi i fundit 12 Korrik 2026, 19:07
Aleksandër Koçeku, mbeti viktimë e një atentati të mirëorganizuar mbrëmjen e së shtunës në zonën e Kirit të Dukagjinit. Koçeku u ekzekutua me breshëri kallashnikovi teksa lëvizte me automjet në aksin Kir–Prekal.
Sipas burimeve pranë grupit hetimor, në vendngjarje janë sekuestruar 25 gëzhoja automatiku, të gjitha të qitura nga e njëjta armë. Ky fakt ka forcuar dyshimet se autorët kishin planifikuar me kujdes lëvizjet e viktimës dhe i kishin zënë pritë me synimin për ta eliminuar.
Hetimet paraprake tregojnë se ndaj 40-vjeçarit është hapur zjarr me breshëri, duke i shkaktuar vdekjen e menjëhershme. Trupi i tij u gjet nga një kalimtar i rastësishëm, i cili njoftoi menjëherë Policinë.
Ekspertët e kriminalistikës kanë kryer këqyrjen e vendit të ngjarjes dhe po analizojnë çdo provë të sekuestruar. Ndërkohë, hetuesit po verifikojnë pamjet e kamerave të sigurisë përgjatë itinerarit që kishte ndjekur viktima para atentatit, pasi zona ku ndodhi krimi nuk mbulohet nga kamera sigurie.
Edhe pse hetimet vijojnë në disa drejtime, pista kryesore mbetet konflikti i vjetër mes familjeve Koçeku dhe Shkambi.
Konflikti daton që nga viti 2017, kur Artan Koçeku, vëllai i viktimës, vrau me armë zjarri Angjelin Shkambin. Për atë krim, Artan Koçeku po vuan dënimin me burg.
Familjarët e Aleksandër Koçekut kanë deklaruar para hetuesve se ai jetonte prej vitesh nën frikën e hakmarrjes dhe tregonte kujdes të vazhdueshëm në lëvizjet e tij.
Ndërkohë, 40-vjeçari do të përcillet për në banesën e fundit ditën e nesërme, ndërsa ceremonia mortore do të zhvillohet në varrezat katolike të Grudës së Re. Policia dhe Prokuroria vijojnë hetimet për identifikimin e autorëve dhe zbardhjen e plotë të atentatit.
