I ftuar në studion e “Kafe Shqeto”, ish-deputeti Petrit Vasili u shpreh se situata ekonomike dhe politike në vend është rezult...
BOTA
A do t’ia besonit blerjet inteligjencës artificiale? Premtimi i madh dhe rreziqet që fshihen pas saj
PiranjatPërditësimi i fundit 19 Prill 2026, 17:43
Agjentët e Artificial Intelligence premtojnë të bëjnë gjithçka — nga organizimi i email-it tuaj si Marie Kondo që rregullon një dollap, deri te blerja e një pale këpucësh sipas buxhetit dhe stilit tuaj.
Megjithatë, ekspertët e teknologjisë paralajmërojnë se delegimi i vendimeve të rëndësishme tek AI sjell rreziqe për konsumatorët. Kjo mund të çojë në gabime komunikimi, humbje financiare dhe madje t’u japë hakerëve akses në të dhënat personale.
Kjo është veçanërisht e vërtetë për të ashtuquajturën “tregti me agjentë” (agentic commerce), ku AI bën blerje në emrin tuaj.
“Ende nuk është bërë diçka e zakonshme dhe është mjaft e rrezikshme tani për tani, sepse nuk ka mjaftueshëm masa sigurie që njerëzit të ndihen rehat t’u besojnë agjentëve të blejnë në mënyrë autonome,” tha Matt Kropp, ekspert i AI në Boston Consulting Group për CBS News. “Mund të blejë edhe një makinë, por unë nuk do t’i jepja kartën time të kreditit.”
Një botë e re Këto shqetësime nuk po i ndalin kompanitë e mëdha amerikane të ecin përpara me tregtinë përmes AI, të cilën e shohin si një mënyrë të re për të angazhuar klientët dhe për të rritur shitjet.
Për shembull, American Express njoftoi shërbime të reja për mbrojtjen e klientëve që bëjnë blerje përmes agjentëve AI, duke përfshirë verifikimin e identitetit të agjentit gjatë blerjes. Kompania tha se kjo do të mbrojë klientët nga tarifat që vijnë si pasojë e gabimeve të AI.
Ndërkohë, asistenti AI i Amazon, i quajtur Rufus, mund të ndjekë çmimet e produkteve, të njoftojë kur ato bien në nivelin e dëshiruar dhe të kryejë blerjen automatikisht.
Edhe Walmart ka prezantuar një agjent AI “bisedor” të quajtur Sparky, që ndihmon përdoruesit të gjejnë produkte, të lexojnë vlerësime dhe të porosisin.
Sipas të dhënave nga Statista, rreth një e katërta e amerikanëve nga 18 deri në 39 vjeç kanë përdorur AI për të kërkuar produkte ose për të bërë blerje.
Çfarë mund të shkojë keq?
Përhapja e shpejtë e AI po sjell edhe probleme.
Një shembull është ai i Sebastian Heyneman, themelues i një startup-i në San Francisko. Sipas The New York Times, ai i kërkoi një agjenti AI t’i siguronte një mundësi për të folur në World Economic Forum në Davos, Zvicër. Agjenti ia arriti qëllimit, por me një kosto prej 30,000 dollarësh, një shumë që ai nuk mund ta përballonte.
Heyneman përdori një bot nga Tasklet. Themeluesi i saj, Andrew Lee, tha se probleme të tilla ndodhin kur udhëzimet që i jepen AI janë kontradiktore.
Ai shtoi se AI sot është plotësisht i aftë të bëjë blerje dhe detyra të zakonshme për konsumatorët, por kjo nuk do të thotë se duhet përdorur në këtë mënyrë.
“Blerjet nuk janë një përdorim i mirë për këto sisteme — të paktën jo ende,” tha ai. “Agjentët janë thelbësisht të vështirë për t’u besuar. Personalisht, nuk ndihem rehat. Dua të kontrolloj vetë se ku shkojnë paratë e mia.”
Arsyeja kryesore: rreziku nga mashtrimet. Sipas Bretton Auerbach, themelues i një startup-i në Nju Jork, aktorët keqdashës mund të mashtrojnë agjentët AI që të zbulojnë të dhëna personale.
“Nëse i jep një agjenti kartën e kreditit dhe i thua ‘shko ble diçka online’, ka mënyra për ta mashtruar,” tha ai. “Ai mund të ngatërrojë një faqe të ligjshme me një faqe phishing që thotë: ‘Vendos këtu numrin e kartës.’”/Përktheu Piranjat News
