Sami Sheen, vajza e aktorit të njohur Charlie Sheen dhe aktores Denise Richards, ka reaguar publikisht ndaj pretendimeve se jeta e saj luksoze financohet...
Credins bank kurorëzohet me çmimin më të rëndësishëm të vitit “Best Bank for Corporate Responsibility 2026&rdq...
BOTA
Administrata Trump planifikon të çarmatosë Hamasin, Kushner dhe Witkoff zbulojnë detajet
PiranjatPërditësimi i fundit 20 Tetor 2025, 08:32
Dhëndri i Presidentit Donald Trump, Jared Kushner, dhe i dërguari i posaçëm amerikan për Lindjen e Mesme, Steve Witkoff, dy figurat kryesore pas marrëveshjes së paqes mes Izraelit dhe Hamasit të iniciuar nga administrata Trump, kanë zbuluar detaje të reja mbi përpjekjet për çarmatosjen e Hamasit dhe rikthimin e rendit në Rripin e Gazës.
Në një intervistë të dhënë në programin televiziv “60 Minutes” të dielën, përpara udhëtimit të tyre në Izrael që pritet të ndodhë të hënën (sot), Kushner dhe Witkoff shpjeguan procesin pas arritjes së marrëveshjes me 20 pika dhe hapat që pritet të ndërmerren më tej.
Kushner paralajmëroi se Hamas pritet të tentojë rikthimin në pushtet duke shfrytëzuar boshllëkun aktual të autoritetit në Gaza.
“Suksesi apo dështimi i kësaj iniciative do të varet nga aftësia e Izraelit dhe e mekanizmit ndërkombëtar për të krijuar një alternativë të qëndrueshme. Nëse kjo ndodh, Hamas do të dështojë dhe Gaza nuk do të përbëjë më kërcënim për Izraelin,” deklaroi ai, raporton New York Post.
Situata në terren mbetet e tensionuar. Hamas ka shkelur marrëveshjen e armëpushimit duke hapur zjarr ndaj forcave izraelite në Rafah, sipas autoriteteve izraelite, ndërsa gjithashtu ka kryer ekzekutime publike të palestinezëve në përpjekje për të ruajtur kontrollin mbi territorin.
Ndërkohë, drejtuesit e Hamasit kanë refuzuar të heqin dorë nga armët, një vendim që vë në rrezik serioz zbatimin e marrëveshjes.
Për të bindur grupin të dorëzojë armët dhe mjetet e tjera të dhunës, Witkoff njoftoi se do të organizohet një program blerjeje të armëve nga individët, një masë që synon të parandalojë rikthimin e forcës së Hamasit në pushtet në enklavën palestineze.
Kushner, nga ana tjetër, tha se janë duke “testuar terrenin” për krijimin e një trupi të përkohshëm qeverisës në Gaza, i cili do të raportojë para një “Bordi të Paqes” të kryesuar nga vetë Trump, megjithëse ky bord nuk është formuar ende.
Sipas marrëveshjes, komiteti qeverisës do të përfshijë palestinezë të kualifikuar dhe ekspertë ndërkombëtarë. Kushner theksoi se është ende “shumë herët për të thënë” nëse ekziston potencial për demokraci në Gaza, duke shtuar se fokusi kryesor për momentin është “ta bëjnë funksionale” gjatë fazës së rindërtimit.
Të dy përfaqësuesit, Kushner dhe Witkoff, theksuan se të gjitha veprimet e tyre dhe të “Bordit të Paqes” do të jenë tërësisht transparente, me qëllim ndërtimin e besimit mes të gjitha palëve të përfshira.
