Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
BOTA
Akuzohet për bashkëpunim me inteligjencën izraelite, arrestohet një shqiptar nga Kosova në Turqi
M.B.Përditësimi i fundit 3 Shtator 2024, 11:40
Foto ilustruese
TURQIA- Policia turke ka arrestuar një shtetas të Kosovës, i cilin e akuzon se ka trasferuar para te operativët e agjencisë izraelite të inteligjencës Mossad në Turqi, raportoi agjencia shtetërore turke e lajmeve, Anadolu. Autoritetet e Kosovës thanë se janë informuar zyrtarisht nga Turqia për këtë rast. I arrestuari në Stamboll është identifikuar si Liridon Rexhepi nga Kosova. Ai kishte hyrë në Turqi më 25 gusht, u ndalua të premten e kaluar dhe të martën zyrtarisht u arrestua, tha Anadolu.
Sipas agjencisë Anadolu, Rexhepi gjatë marrjes në pyetje ka pranuar se ka bërë transferime të parave. Ministrja e Drejtësisë e Kosovës, Albulena Haxhiu, gjatë një konference për media në Prishtinë më 3 shtator, tha pak para nisjes së konferencës pranuan pyetje nga Turqia lidhur me këtë rast.
“Në këtë drejtim, na kanë dërguar edhe pyetje me shkrim për rastin në fjalë posa hyra në këtë konferencë dhe për shkak të ndjeshmërisë së çështjes, sepse në përgjithësi këto informacione janë të ndjeshme, sidomos kur jepet informacioni pa u kryer një veprim siç duhet. Unë kam kërkuar nga drejtori i departamentit të më njoftoj vetëm për çështjet të cilat mund të njoftohet publiku”, tha ajo duke shtuar se më vonë gjatë ditës Ministria e Drejtësisë do të japë informacione të tjera për këtë rast.
Haxhiu po ashtu tha se bashkëpunimi juridik mes Kosovës dhe Turqisë është i mirë. Radio Evropa e Lirë ka kontaktuar Ministrinë e Punëve të Jashtme dhe atë të Punëve të Brendshme lidhur me këtë rast, por ende nuk ka marrë përgjigje. Që nga janari, autoritetet turke kanë arrestuar dhjetëra persona, përfshirë edhe hetues privatë, nën akuzat se kanë mbledhur të dhëna për individë, kryesisht për palestinezë që jetojnë në Turqi, dhe ato të dhëna ia kanë dërguar inteligjencës izraelite. Izraeli nuk ka komentuar arrestimet e bëra në Turqi.
Që nga nisja e luftës mes Izraelit dhe Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian, në Gazë, presidenti i Turqisë, Recep Tayyip Erdogan, ka qenë një prej kritikëve më të zëshëm të veprimeve të ushtrisë izraelite, dhe e ka lavdëruar Hamasin, duke thënë se është një grup çlirimtar. Në maj, Turqia ndaloi të gjithë tregtinë me Izraelin dhe ka aplikuar që të bëhet pjesë e një rasti të gjenocidit kundër Izraelit në Gjykatën Ndërkombëtare të Drejtësisë në Hagë./ REL
