Autoritetet belge kanë vënë në pranga Gerd Gjinararin, i njohur ndryshe si “Gert Gjenerali”, i cili ishte i shpallur në k...
BOTA
Arrestim tronditës/ Pas 9 vitesh mister, kapet bankieri multimilioner i dyshuar për shtyrjen fatale nën autobus në Londër
PiranjatPërditësimi i fundit 15 Qershor 2026, 12:48
Një bankier multimilioner dhe oficer i dekoruar i Ushtrisë Britanike, me lidhje me familje mbretërore, është arrestuar në rastin e famshëm të njohur si “Putney Pusher”.
Policia që po heton këtë dosje të mbetur pezull prej vitesh, ku një burrë shtyu qëllimisht një grua nën një autobus 12-tonësh, ka vënë në pranga një 44-vjeçar.
Arrestimi vjen nëntë vite pas incidentit të mistershëm, kur një vrapues në Putney Bridge të Londrës shtyu një grua në rrugën e autobusit.
Pamjet e kamerave të sigurisë kishin dokumentuar ngjarjen tronditëse, duke nisur një hetim të gjerë për identifikimin e autorit.
Pas incidentit, detektivët intervistuan rreth 50 persona dhe arrestuan tre të dyshuar, përfshirë edhe një bankier amerikan investimesh.
Megjithatë, askush nuk u akuzua zyrtarisht dhe rasti u kthye në një nga misteret më të famshme të pazgjidhura në Britani.
Pas mbylljes së hetimeve në vitin 2018, informacione të reja kanë çuar në zhvillime të papritura, duke sjellë arrestimin e sotëm.
Sipas raportimeve, i dyshuari ka lidhje me disa familje mbretërore europiane, përfshirë edhe Shtëpinë e Windsor-it.
Ai është drejtues në një bankë private dhe ka shërbyer më parë në Ushtrinë Britanike në disa konflikte ushtarake.
Pas largimit nga ushtria, ai dyshohet se ka punuar në sektorin financiar, duke këshilluar klientë dhe organizata me pasuri të mëdha.
Ai ndodhet ende në paraburgim, i arrestuar nën dyshimin për shkaktim të lëndimeve të rënda me dashje.
Një zëdhënës i Policisë Metropolitane tha:
“Ditën e hënë, më 15 qershor, një 44-vjeçar u arrestua nën dyshimin për shkaktim të lëndimeve të rënda me dashje. Ai ndodhet në paraburgim ndërsa hetimet vazhdojnë.”
Britania u trondit kur pamjet e CCTV treguan momentin kur vrapuesi misterioz shtyu një grua të panjohur në rrugën e autobusit.
33-vjeçarja për pak sa nuk humbi jetën, pasi shoferi i autobusit arriti të frenojë në kohë dhe të shmangë përplasjen fatale.
Shoferi hero, Olivier Salbris, ka thënë më herët se ngjarja nuk i është larguar nga mendja dhe se e kujton sa herë kalon mbi urë.
Pas sulmit, autori u kthye në vendngjarje rreth 15 minuta më vonë, por më pas u zhduk duke u larguar drejt zonës së Fulhamit në Londrën Jugperëndimore.
Në atë kohë, ai përshkruhej si një burrë i bardhë, rreth të 30-ave, me trup mesatar dhe flokë të shkurtra kafe, i veshur me bluzë gri dhe pantallona të shkurtra blu të errët.
Policia kishte bërë thirrje publike dhe kishte analizuar qindra orë pamje kamerash, por pa arritur ta identifikojë për vite me radhë./Përktheu Piranjat News
