Dritare të thyera, njolla zjarri nëpër mure: ministria e Arsimit në Tiranë mbart gjurmët e protestave të ditëve të...
BOTA
Banka Amerikane bie dakord të zgjidhë padinë e ngritur nga akuzuesit e Jeffrey Epstein
PiranjatPërditësimi i fundit 17 Mars 2026, 11:16
Bank of America ka rënë dakord për zgjidhjen e një padie të ngritur në emër të viktimave të Jeffrey Epstein, të cilët e akuzonin bankën se kishte lehtësuar operacionin e tij të trafikimit seksual.
Kushtet e marrëveshjes, e cila tani duhet të miratohet nga gjykata, nuk janë bërë të ditura menjëherë.
Kjo është marrëveshja e tretë e këtij lloji nga një bankë e madhe, pasi më parë JPMorgan Chase dhe Deutsche Bankpranuan të paguajnë përkatësisht 290 milionë dollarë (218 milionë paund) dhe 75 milionë dollarë.
Sigrid McCawley, avokate e viktimave, tha në një deklaratë se kjo zgjidhje është “edhe një hap tjetër drejt drejtësisë së shumëmerituar.” Ndërkohë, Bank of America nuk pranoi të komentojë.
Padia kolektive e propozuar u paraqit në tetor nga një grua nga Florida, e cila thotë se është abuzuar nga Epstein “të paktën 100 herë” midis viteve 2011 dhe 2019 dhe se, me udhëzimin e ekipit të tij të biznesit, kishte hapur dy llogari në Bank of America.
Në padi pretendohet se banka kishte “një sasi të madhe informacioni mbi operacionin e trafikimit seksual të Epstein, por zgjodhi fitimin në vend të mbrojtjes së viktimave.”
Dokumenti përmend gjithashtu një histori të “sjelljes bankare jashtëzakonisht alarmante dhe të paqëndrueshme”në llogaritë e saj në Bank of America, të cilat sipas padisë përdoreshin nga ekipi i Epstein.
Padia përmend edhe më shumë se 150 milionë dollarë të paguara ndaj Epstein nga miliarderi Leon Black, bashkëthemelues i Apollo Global Management, për atë që u përshkrua si “këshilla për planifikim taksash dhe trashëgimie”, përmes llogarisë së Black në Bank of America.
Black, i cili u tërhoq nga Apollo mes shqyrtimit të lidhjeve të tij me Epstein, ka mohuar çdo keqbërje. Ai pritej të merrej në pyetje si pjesë e çështjes më vonë gjatë këtij muaji.
Bank of America më herët i kishte kërkuar gjykatës të rrëzonte padinë, duke thënë se kishte ofruar shërbime rutinë bankare për persona që në atë kohë nuk kishin lidhje të njohura me Epstein, dhe e kishte quajtur padinë “të dobët dhe pa bazë.”
Të dyja palët i thanë një gjyqtari të hënën se kishin arritur një “marrëveshje në parim”, sipas dokumenteve gjyqësore. Ato pritet të paraqesin më shumë informacion më 27 mars, ndërsa një seancë gjyqësore është planifikuar për 2 prill./Përktheu Piranjat News
