Është arrestuar autori i plagosjes në Shijak, Elton Beqiri.
Ngjarja u regjistrua një ditë më parë, ku i plagosur mbeti Bjo...
BOTA
BE vendos sanksione ndaj kolonëve izraelitë
PiranjatPërditësimi i fundit 11 Maj 2026, 23:47
Bashkimi Evropian ka arritur marrëveshje për vendosjen e sanksioneve ndaj disa kolonëve izraelitë në Bregun Perëndimor dhe drejtuesve të lëvizjes palestineze Hamas. Vendimi u mor gjatë takimit të Ministrave të Jashtëm të vendeve anëtare të BE-së në Bruksel.
Paketa e sanksioneve ndaj kolonëve izraelitë ishte bllokuar për muaj të tërë nga Hungaria, nën drejtimin e ish-kryeministrit Viktor Orban. Megjithatë, pas emërimit të kryeministrit të ri Peter Magyar, vetoja u hoq dhe marrëveshja u miratua shpejt. Sanksionet prekin tre kolonë izraelitë dhe katër organizata të kolonëve, edhe pse emrat e tyre ende nuk janë bërë publike.
Shefja e politikës së jashtme të BE-së, Kaja Kallas, deklaroi se ishte koha që blloku evropian të kalonte “nga bllokimi në veprim”, duke theksuar se ekstremizmi dhe dhuna duhet të kenë pasoja. Ministri i Jashtëm francez Jean-Noel Barrot e përshëndeti vendimin, duke thënë se BE po ndëshkon organizatat kryesore izraelite që mbështesin kolonizimin ekstremist dhe të dhunshëm në Bregun Perëndimor. Ai shtoi se këto akte janë të papranueshme dhe duhet të ndalen menjëherë.
Nga ana tjetër, Izraeli reagoi ashpër ndaj masave. Ministri i Jashtëm Gideon Saar tha se BE po vepron në mënyrë arbitrare dhe politike kundër qytetarëve izraelitë, vetëm për shkak të bindjeve të tyre politike. Ai përsëriti qëndrimin e Izraelit se hebrenjtë kanë të drejtë të vendosen në Bregun Perëndimor, megjithëse komuniteti ndërkombëtar i konsideron këto vendbanime të paligjshme sipas ligjit ndërkombëtar.
Edhe ministri i Sigurisë Kombëtare, Itamar Ben Gvir, e quajti Bashkimin Evropian “antisemitik”, duke deklaruar se kolonët izraelitë do të vazhdojnë të ndërtojnë dhe të zgjerohen në të gjithë territorin që Izraeli e konsideron si tokë të veten historike.
Në të njëjtën kohë, ministrat evropianë vendosën sanksione edhe ndaj liderëve të Hamasit, organizatë që mori pjesë në sulmin ndaj Izraelit më 7 tetor 2023. Sulmi shkaktoi rreth 1,200 viktima dhe mbi 240 pengje. Franca tha se Hamasi duhet të çarmatoset dhe të mos ketë rol në të ardhmen politike të Palestinës.
Ndërkohë, situata në Bregun Perëndimor vazhdon të mbetet shumë e tensionuar. Sipas OKB-së, që nga fillimi i luftës në Gaza, mbi 1,000 palestinezë janë vrarë në territor nga përleshjet, operacionet ushtarake izraelite dhe dhuna e kolonëve.
