Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
BOTA
"Beogradi duhet të ndryshojë qasjen për të pasur një normalizim të mirëfilltë", ish-ambasadori Spahiu: Kosovës i mungon lobimi ndërkombëtar, veçanërisht në Uashington!
n.fPërditësimi i fundit 31 Mars 2025, 17:06
KOSOVË- Ish-ambasadori i Kosovës në Shtetet e Bashkuara të Amerikës, Avni Spahiu ka kritikuar mungesën e një angazhimi të mirëfilltë të Kosovës për lobim ndërkombëtar, veçanërisht në Uashington. Spahiu u shpreh se angazhimi i Departamentit amerikan i Shtetit, Shtëpia e Bardhë dhe Kongresi amerikan janë më të rëndësishme se kurrë. Në një intervistë për KosovaPress, ish-diplomati thekson se edhe ndryshimet gjeopolitike bëjnë që ky angazhim të jetë jashtëzakonisht i nevojshëm.
Sipas tij, ndryshimet në politikën e jashtme amerikane nën administratën e presidentit Donald Trump, po sjellin një doktrinë të re me synimin për ta rikthyer Amerikën si forcë udhëheqëse në arenën ndërkombëtare. Spahiu shton se Evropa duhet të marrë më shumë përgjegjësi për sigurinë e saj dhe të mos pres gjithmonë ndihmën e SHBA-së.
Vetë administrata Trump paralajmëroi se Evropa duhet të marrë më shumë përgjegjësi, ndërsa së fundi Bashkimi Evropian u bëri thirrje qytetarëve në të gjithë kontinentin që të grumbullojnë ushqime, ujë dhe sende të tjera thelbësore që zgjasin të paktën 72 orë pasi lufta, sulmet kibernetike, ndryshimet klimatike dhe sëmundjet rrisin shanset për një krizë. Ai foli edhe për ndryshimet që po e presin botën.
“Nga ana tjetër do të ndryshojnë shumë gjëra edhe në aspektin e gjeopolitikës, do të kemi një rifokusim të Amerikës në rajone të ndryshme të botës, do të ketë qasje të ndryshme ndaj shumë vendeve, ndaj shumë krizave, dhe tani duhet të pritur se çfarë do të jenë ato, është pikëpyetje t’i dimë të gjitha, por flasim në bazë të indikacioneve, shpalimeve që bënë kjo administratë që nga dita e parë, tani nuk kanë kaluar as dy muaj të plotë dhe e shohim se çfarë dridhjesh ka shkaktuar kjo qasje e re e SHBA-së”, shton ai.
Ish-ambasadori është i bindur se Shtetet e Bashkuara do të vazhdojnë të kontribuojnë në forcat e KFOR-it, të udhëhequra nga NATO, duke mohuar kështu zërat që paralajmëronin të kundërtën.
“Nuk mendoj se kjo do të ndodhë, janë disa gjëra që obligojnë çdo administratë amerikane, janë disa pika prej të cilave ata nuk heqin dorë. SHBA janë pjesë e misionit të NATO-s, nuk janë vetëm, ndonëse kanë rol parësor në forcat e KFOR-it, por nuk shoh asnjë arsye që Shtetet e Bashkuara të bëjnë këtë.
Presidenti Trump ka kërkuar nga aleatët që t’i rrisin shpenzimet dhe gjërat nuk janë aq alarmante që ne të brengosemi në këtë aspekt. Nuk besoj se Shtetet e Bashkuara do të tërhiqen, kjo dobëson edhe pozicionin e tyre si superfuqi. Nëse SHBA tërhiqet nga vatrat e krizave kush do t’i zëvendësojë, këto ndryshime gjeostrategjike, gjeopolitike do të ishin të paparashikueshme. Prandaj nuk shoh atë rrezik që do të shpaloset tani apo në të ardhmen”, tha Spahiu.
Ish-diplomati flet edhe për zhvillimet në Serbi, ndërkohë që thekon se ky vend nuk ka treguar shenja të vullnetit të mirë për të zgjidhur madje as çështjet humanitare, siç janë personat e zhdukur. Ai kritikoi regjimin e presidentit serb, Aleksandar Vuçiç teksa thekson se Beogradi duhet të ndryshojë qasjen për të pasur një normalizim të mirëfilltë me Kosovën.
“Unë pres që do të ketë përpjekje si deri më tani, do të ketë incidente për të mbajtur gjendjen e tensionuar, nuk do të ketë sulm të tillë që do të shkaktonte një konfrontim të përmasave më të gjera midis dy vendeve. Mendoj se Serbia do të vazhdojë me politikën e vetë agresive ndaj Kosovës. Nuk mendoj se regjimi i sotëm serb bënë përjashtim nga regjimet e mëparshme totalitare, dhe këtu kam ndërmend edhe regjimin e Millosheviçit dhe siç e dini në atë kohë ka pasur protesta dhe trazira.
Ndryshimet që i duhen Serbisë nuk janë madje as në programin e opozitës që kërkon rrëzimin e qeverisë së Vuçiçit sepse kërkohet një demokratizim i plotë dhe një ndarje përfundimtare nga e kaluara nacionaliste e regjimit të sotëm ndaj regjimeve të kaluara. Kjo nuk është diçka që mund të presim në të ardhmen, mund të ketë një qeveri tjetër që do të ndryshojë strategjinë por jo mentalitetin, dhe kjo është për të ardhur keq”, shprehet ish-ambasadori.
Spahiu foli edhe për rëndësinë e Këshillit të Ambasadorëve të Kosovës të cilin aktualisht e udhëheq.
“[Këshilli] Duhet të shihet si një burim ndihme për shtetin dhe jo si opozitë ndaj tij”, shprehet ai derisa shton se ish-ambasadorët mund të japin kontribut të vyer për çështje esenciale për vendin.
